Ludmiła Kłaskoŭskaja, maci asudžanaj u Šviecyi biełaruski Volhi Kłaskoŭskaj, maje namier prasić karalevu Šviecyi pra dapamohu svajoj asudžanaj dačce.
Jak paviedamiła Ludmiła Kłaskoŭskaja BiełaPAN, jana źbirajecca prainfarmavać karalevu Silviju, jakaja ŭznačalvaje Mižnarodny dziciačy fond, pra «trahiedyju biełaruskaj emihrantki», u tym liku «pra niezakonnaje adbirańnie dziciaci ad maci» - małaletniaha syna Volhi Adama sacyjalnymi słužbami stakholmskaj kamuny Chaninhie.
Pavodle słoŭ Ludmiły Kłaskoŭskaj, niahledziačy na šmatlikija zvaroty Volhi i administracyi śledčaha izalatara, dzie jana ŭtrymlivajecca, da sacyjalnych słužbaŭ Chaninhie, apošnija ŭsialak pieraškadžajuć spatkańniu maci ź dziciem.
«Ni Volha, ni ja ničoha nie viedajem pra los Adama, dzie i z kim jon znachodzicca, — zaznačyła Ludmiła Kłaskoŭskaja. — Ad svajho imia ja źviarnułasia ŭ sud, jaki prymaŭ rašeńnie ab pieradačy apieki nad dziciem baćku, z tym, kab daviedacca pra los svajho ŭnuka, a taksama paprasiła, kab mnie, jak rodnaj babuli, dali pabačycca z Adamam».
Nieviadoma taksama, ci adbyŭsia sudovy šlubarazvodny praces pamiž Volhaj Kłaskoŭskaj i Hiokajem Biezhinam. Jak skazała Ludmiła Kłaskoŭskaja, nijakich dakumientaŭ nakont hetaha Volzie nie pastupała, joj ničoha nie paviedamlali.
Tym časam paśla čarhi admoŭ stakholmski sud zaćvierdziŭ u jakaści abaroncy Volhi Kłaskoŭskaj viadomaha šviedskaha advakata Tomasa Nilsana. Pavodle słoŭ Ludmiły Kłaskoŭskaj, jon užo raspačaŭ vyvučać materyjały kryminalnaj spravy. «My vielmi raźličvajem na jaho prafiesijanalizm, aŭtarytet i reputacyju. My čuli tolki dobryja vodhuki pra jaho ad tych, kaho jon raniej abaraniaŭ», — padkreśliła maci asudžanaj.
Samaadčuvańnie Volhi, pavodle jaje słoŭ, narmalizavałasia. «Raniej dačka skardziłasia na serca, zaraz joj pryznačyli lačeńnie, dajuć zaspakajalnaje», — paviedamiła Ludmiła Kłaskoŭskaja. Aprača taho, apošnim časam Volhu aktyŭna padtrymlivaje chryścijanskaja carkva Stakholma, na 24 vieraśnia ŭ jaje pryznačana sustreča z pastaram.
Nahadajem, niekalki hadoŭ tamu Kłaskoŭskaja atrymała status palityčnaha biežanca ŭ suviazi ź pieraśledam na radzimie za apazicyjnyja pierakanańni. U 2011 hodzie Volha viarnułasia ŭ Biełaruś z-za siamiejnych prablem, ale nieŭzabavie znoŭ pajechała ŭ Šviecyju, dzie vyjšła zamuž za miascovaha žychara Hiokaja Biezhina, a ŭ lipieni 2012 hoda naradziła syna Adama.
Dakumienty na atrymańnie prava na žycharstva ŭ Šviecyi padavała dvojčy: paśla zaklučeńnia šlubu i paśla naradžeńnia dziciaci. U kancy studzienia 2013 hoda stała viadoma, što ŭłady Šviecyi admovili joj u atrymańni prava na žycharstva i pryniali rašeńnie ab jaje departacyi biez mahčymaści abskardžańnia. U pačatku lutaha pradstaŭniki sacyjalnych słužbaŭ Šviecyi zabrali ŭ Kłaskoŭskaj małaletniaje dzicia ŭ suviazi z tym, što ŭ jaje niama prava na žycharstva ŭ hetaj krainie i jana nibyta nie moža zabiaśpiečyć synu narmalnyja ŭmovy pražyvańnia.
2 krasavika stała viadoma, što Volha Kłaskoŭskaja zatrymanaja ŭ horadzie Chaninhie pa padazreńni ŭ zamachu na zabojstva svajho muža i źmieščana ŭ turmu.
Dačka Volhi ad pieršaha šlubu Mirasłava pa rašeńni šviedskich uład taksama padlahała departacyi. U Šviecyju pa dziaŭčynku jeździła jaje babula Ludmiła Kłaskoŭskaja. Ciapier Mirasłava znachodzicca ŭ Minsku.
23 žniŭnia stakholmski sud pryznaŭ Volhu Kłaskoŭskuju vinavataj u zamachu na zabojstva muža Hiokaja Biezhina. Volha pryhavoranaja da vaśmi hadoŭ turemnaha źniavoleńnia i pavinna vypłacić hrašovuju kampiensacyju Biezhinu ŭ 110 tysiač šviedskich kron.
14–16 kastryčnika kryminalnuju spravu biełaruski pavinien razhladać apielacyjny sud Stakholma.
