Kalehija pa kryminalnych spravach Viarchoŭnaha Sudu Biełarusi 22 kastryčnika admianiła śmiarotny prysud Alaksandru Hrunovu.
Fota «Homielskaja praŭda».
Viarchoŭny sud razhledzieŭ kasacyjnuju skarhu asudžanaha da śmiarotnaha pakarańnia Alaksandra Hrunova na prysud Homielskaha abłasnoha sudu ad 14 červienia 2013 hodu.
Pra heta paviedamiŭ kaardynatar kampanii «Pravaabaroncy suprać śmiarotnaha pakarańnia ŭ Biełarusi» Andrej Pałuda.
25-hadovy Alaksandar Hrunoŭ 20 vieraśnia 2012 hodu zabiŭ svaju znajomuju Natallu Jemialjančykavu. Na sudzie jon patłumačyŭ, što dziaŭčyna za niekatory čas da sustrečy abraziła jaho ŭ kampanii znajomych ludziej i nie paprasiła prabačeńnia. Heta i stała pryčynaj ahresii. Hrunoŭ nanios achviary 102 nažavyja ranieńni.
14 červienia rašeńniem Homielskaha abłasnoha sudu Alaksandru Hrunovu pryznačanaja vyklučnaja miera pakarańnia — rasstreł.
U sudzie abvinavačany vinu pryznaŭ całkam i paprasiŭ prabačeńnia ŭ maci Natalli Jemialjančykavaj.
Andrej Pałuda adznačyŭ, što takoje zdaryłasia ŭpieršyniu, kali Viarchoŭny sud admianiŭ śmiarotnaje pakarańnie i nakiravaŭ spravu na novy razhlad.
«Heta zdaryłasia ŭpieršyniu ŭ najnoŭšaj historyi. Prynamsi ciaham taho času, pakul dziejničaje kampanija «Pravaabaroncy suprać śmiarotnaha pakarańnia ŭ Biełarusi» — z 2009 hodu Nakolki nam viadoma, u 2000-ch hadach takoj sytuacyi jašče nie było».
Karespandent: A ci možna być upeŭnienym, što sud, pierahledzieŭšy spravu, nia vyniesie paŭtorna śmiarotny prysud?
Pałuda: Ciažka skazać, sud budzie ŭ novym składzie. Składana prahnazavać vynik. Ale budziem spadziavacca, što paśla taho jak Viarchoŭny sud admianiŭ vyrak i źviarnuŭ uvahu na dovady advakata, budzie vyniesiena nie śmiarotnaje pakarańnie. Što heta budzie, naprykład, doŭhaterminovaje ci pažyćciovaje źniavoleńnie.
Karespandent: Čamu ž Viarchoŭny sud admianiŭ rašeńnie?
Pałuda: Nielha kazać, što heta było dla nas niečakanym. Ja maju na ŭvazie vystup advakata i jaho dadatki da kasacyjnaj skarhi. Advakat źviarnuŭ uvahu na vielmi pryncypovyja rečy, na parušeńni pracesualnych normaŭ na pačatku i padčas samoha śledztva. I było pastaŭlena pytańnie ab parušeńni pravoŭ čałavieka, kali kazać pra samoha Hrunova. Na hetyja momanty sud usio ž źviarnuŭ uvahu.
Karespandent: Ci možna nazvać heta pieramohaj pravaabaroncaŭ?
Pałuda: Ja nie vykarystoŭvaŭ by takija vielmi hučnyja słovy. Pra heta budziem kazać, kali ŭviaduć maratoryj na śmiarotnaje pakarańnie. Ale heta moža stać pieršym krokam da vielmi dobraj tendencyi ŭ hetym pytańni. I spadziajemsia, što dziaržava pastavicca da hetaha, jak zaklikajuć pravaabaroncy i častka hramadztva. I śmiarotnaje pakarańnie ŭ našaj krainie budzie admieniena.
