Mintrans Biełarusi rychtuje pieralik daroh, jakija mohuć być addadzienyja ŭ kancesiju. Pra heta na pres-kanfierencyi 11 lutaha paviedamiŭ namieśnik načalnika hałoŭnaha ŭpraŭleńnia aŭtamabilnych daroh Ministerstva transpartu i kamunikacyj Alaksandr Hałaŭnioŭ.
Jon nahadaŭ, što zakon ab kancesii nabyŭ moc z 1 studzienia 2014 hoda. «U adpaviednaści z hetym zakonam dziaržava pavinna vyznačyć pieralik abjektaŭ, jaki jana hatova pieradać u kancesiju. My zaraz pracujem sumiesna ź Ministerstvam finansaŭ pa stvareńni takoha pieraliku. Mintrans budzie prapanoŭvać u hety pieralik darohi M7 (Minsk — miaža Litvy), M3 (Minsk — Viciebsk), M10 (Homiel — Brest)», — paviedamiŭ Hałaŭnioŭ.
Pavodle jaho słoŭ, užo praviedzienyja papiarednija pieramovy z tryma kampanijami, jakija vykazali žadańnie ŭziać udzieł u inviestycyjnych prajektach ź Ispanii, Polščy i Francyi.
«Ale ŭ adpaviednaści z zakanadaŭstvam kancesijaniery vybirajucca pa konkursie, tamu kazać pra kankretnuju kampaniju, ź jakoj my budziem pracavać, da tarhoŭ niavarta», — skazaŭ namieśnik načalnika ŭpraŭleńnia. Pavodle jaho słoŭ, pierad zaklučeńniem dahavoru kampanii pavinny raspracavać biźnies-płan i mieć mahčymaści kancesii.
«Kancesija — cikavaja tema, jakaja maje na ŭvazie nie vydzialeńnie kredytu, a pieradaču daroh pradpryjemstvu ci arhanizacyi, jakija ŭkładvajuć svaje ci pryciahnutyja hrošy ŭ madernizacyju daroh i na praciahu 20 hadoŭ jaje ŭtrymlivajuć. I źbirajučy płatu, viartajuć svaje zatraty. Heta najbolš prahresiŭny sposab. Heta nie kredyt, jaki treba viartać, a bolš cyvilizavanaja forma dziaržaŭna-pryvatnaha partniorstva», — miarkuje pradstaŭnik Mintransa.
Pry hetym jon padkreśliŭ, što nie abaviazkova addadzienaja ŭ kancesiju daroha stanie płatnaj. «Pry ŭviadzieńni płatnych daroh my hladzim na najaŭnaść biaspłatnych daroh. Kazać pa toje, što ŭsie darohi buduć płatnyja, nielha i nierealna. Ja dumaju, što maksimalnaja miaža płatnych daroh u Biełarusi — 2-2,2 tys. km z 16 tys. km respublikanskich daroh na hety momant», — padkreśliŭ Hałaŭnioŭ.
