U Ruskaj pravasłaŭnaj carkvie ŭviadzieńnie rasijskich vojskaŭ na terytoryju Ukrainy ličać zakonnym. Pra heta zajaviŭ kiraŭnik sinadalnaha Adździeła pa ŭzajemaadnosinach Carkvy i hramadstva protaijerej Usievaład Čaplin.
«Jašče ŭ 1995 hodzie Suśvietny ruski narodny sabor zajaviŭ, što ruski narod — padzielenaja nacyja na svajoj histaryčnaj terytoryi, jakaja maje prava na ŭźjadnańnie ŭ adzinym dziaržaŭnym ciele, i hetaje prava źjaŭlajecca ahulnapryznanaj normaj mižnarodnaj palityki», — skazaŭ jon.
Protaijerej vykazaŭ nadzieju na toje, što siońnia «prava hetych ludziej na ich samastojny, svabodny cyvilizacyjny vybar budzie harantavana».
«Adnačasova budziem spadziavacca i na toje, što misija rasijskich voinaŭ pa abaronie svabody i samabytnaści hetych ludziej i samoha ich žyćcia nie sustrenie žorstkaha supraciŭleńnia, jakoje pryviadzie da bujnamaštabnych sutyknieńniaŭ», — padkreśliŭ śviatar.
Miž tym Ukrainskaja pravasłaŭnaja carkva Maskoŭskaha patryjarchata źviarnułasia da patryjarcha Kiryły z adčajnym zaklikam nie dapuścić pralićcia kryvi na terytoryi Ukrainy, a taksama «ŭzvysić svoj hołas ab zachavańni cełasnaści terytoryi Ukrainskaj dziaržavy».