Eks-ministar abarony Japonii Juryka Koike rascaniła dziejańni Maskvy ŭ Krymie jak «bandyckija» i vykazała zdahadku, što Rasieja viartajecca da «biezrazvažnych imperskich ambicyjaŭ».
Vyspy Iturup, Kunašyr, Šykatan i Chabamai apynulisia pad kantrolem SSSR paśla druhoj suśvietnaj vajny, nahadvaje jana. «I, jak usiudy ŭ Rasiei, ich žychary byli biedniakami, jakija pakutavali ad niekampetentnaha i karumpavanaha ŭradu, – śćviardžaje eks-ministr.
Ciapier Tokio varta ličyć «iłžyvymi» abiacańni prezydenta RF Uładzimiera Pucina z nahody pieramovaŭ pa Kuryłach, miarkuje jana.
Bolšaść japoncaŭ ličyć, što dziejańni Rasiei pa Ŭkrainie byli vyznačanyja ekspansijanisckim hienam, jaki ad pačatku źmiaščajecca ŭ palityčnym DNK Rasiei, a nie asabistaj pazycyjaj Pucina i charaktaram ŭkrainskaha kryzisu, piša Koike ŭ Project-syndiate. Japoniju dadzienaja sytuacyja turbuje jak adzinuju ŭ G7 krainu, jakaja maje terytaryjalnuju sprečku z Rasiejaj.
Koike nazyvaje «dziŭnaj histaryčnaj ironijaj» toj fakt, što na sprečnych terytoryjach žyvie mnostva etničnych ukraincaŭ. «Kali b referendum ab niezaležnaści adbyŭsia na vostravie Iturup, dzie kala 60% žycharoŭ majuć karani va Ŭkrainie, ci Pucin pryznaŭ by vynik hetak ža lohka, jak u Krymie?» – pytajecca palityk.
Koike nahadała, što paśla prychodu da ŭłady ŭ 2012 hodzie premjera Sindza Abe ŭrad Japonii sprabavaŭ naładzić adnosiny z Pucinym u nadziei na surjoznyja pieramovy pa paŭnočnym terytoryjach.
«Ale ciapier, kali Pucin zrabiŭ svaje plany imperskaj restaŭracyi kryštalova jasnymi, hetyja nadziei apynulisia miortvanarodžanymi», – miarkuje eks-ministr abarony.
Nastupstvy pierachodu Krymu pad rasiejskuju jurysdykcyju majuć važnyja nastupstvy dla adnosin pamiž azijackimi dziaržavami, asabliva pakazalnaj, na dumku Koike, źjaŭlajecca reakcyja Kitaja. «Kožnaja kraina ŭ Azii pavinna zrabić tolki adnu vysnovu z maŭklivaje ŭchvały Kitajem zachopu Pucinym krymskaj ziamli: Kitaj taksama ličyć, što mocny zaŭsiody maje racyju, i moža tak ža dziejničać na sprečnych terytoryjach, budź to ŭ Paŭdniova-Kitajskim mory abo indyjskich Himałajach», – havorycca ŭ artykule.
Japonija, pavodle eks-ministra abarony, maje namier pracavać z partnerami ŭ G7, kab «biezrazvažnyja ambicyi Pucina nie pastavili pad pahrozu inšyja častki Ŭkrainy». Pakul, nahadvaje jana, u Tokio pryniataje rašeńnie dać Kijevu 1,5 młrd dalaraŭ ekanamičnaj dapamohi.
Tym časam, adznačaje eks-ministr, Rasieja viartajecca da «stahnacyi poźniaj savieckaj epochi», a Pucin biare na ŭzbrajeńnie deviz Leanida Brežnieva «trymacca za toje, što majem».
Heta, na dumku Koike, aznačaje, što słovy Pucina ab pahadnieńni ź Japonijaj pa Kurylskich vyspach hetak ža chłuślivyja, jak i jaho zapeŭnivańni, što rasiejcy ŭ Krymie znachodzilisia ŭ niebiaśpiecy i majuć patrebu ŭ abaronie rasiejskich vojskaŭ.
