Kirroŭca, pa vinie jakoha ŭ Viciebsku zahinuŭ siamihadovy chłopčyk, prysudžany da siami hadoŭ pazbaŭleńnia voli.
Vyrak suda Pieršamajskaha rajona Viciebska byŭ abvieščany 22 krasavika. Raniej płanavałasia, što vierdykt suda budzie viadomy dniom raniej.
22 śniežnia 2013 hoda kala 22.00 na vulicy Horkaha ŭ Viciebsku byŭ učynieny najezd na siamihadovaje dzicia.
Chłopčyk vychodziŭ z tramvaja, jaki stajaŭ na abaznačanym prypynačnym punkcie. Ad atrymanych traŭm dzicia pamiorła ŭ balnicy.
Vadziciel, jak vyśvietliłasia paźniej, byŭ u stanie ałkaholnaha apjanieńnia i ŭciok ź miesca zdareńnia.
U vyniku śpiecpłana «Pierachop» vadziciel byŭ zatrymany supracoŭnikami orhanaŭ unutranych spraŭ. U dačynieńni da jaho USK była raspačata sprava na padstavie č. 4 art. 317 KK (parušeńnie pravił darožnaha ruchu asobaj, jakaja kiravała transpartnym srodkam u stanie ałkaholnaha apjanieńnia, što paciahnuła pa nieaściarožnaści śmierć čałavieka).
Heta pieršaja kryminalnaja sprava, nakiravanaja ŭ sud u Viciebskaj vobłaści paśla taho jak nabyŭ moc zakon «Ab uniasieńni źmianieńniaŭ i dapaŭnieńniaŭ u niekatoryja kodeksy Respubliki Biełaruś pa pytańniach uzmacnieńnia mier adkaznaści za kiravańnie transpartnym srodkam u stanie apjanieńnia».
