Na prośbu Tuzin.fm Narodny artyst Biełarusi Anatol Jarmolenka pryhadaŭ historyju adnaho z samych cudoŭnych tvoraŭ z repiertuaru ansambla «Siabry» — «Ave Maria», muzyku da jakoj napisaŭ Ihar Łučanok, a słovy Zianon Paźniak.
Spadar Anatol kaža, što hetuju pieśniu pakazaŭ jamu kampazitar Ihar Łučanok. Spačatku navat biez paznaki aŭtara vierša Zianona Paźniaka.
«Heta byŭ pačatak 90-ch hadoŭ, čas paśla razvału Sajuzu. Tady panavaŭ taki nastroj, šmat kazałasia pra niezaležnaść. I hetaja pieśnia adpaviadała tamu času. Praŭda ja spačatku trochi skieptyčna pastaviŭsia da jaje, choć usio było vydatna ź miełodyjaj, i da vierša anijakich pretenzij nie mieŭ. Usio vyhladała arhanična, tamu i ŭziali jaje ŭ repiertuar. «Malitva» jana zvałasia pieršapačatkova».
Anatol Jarmolenka i Ihar Łučanok u toj čas sustrelisia z aŭtaram słovaŭ Zianonam Paźniakom.
Spadar Anatol tak zhadvaje tuju sustreču: «Heta byŭ niedzie 1991 hod. Jaho reakcyja była narmalnaja. Tak, kab «och!» dy «ach!», to nie.
Asablivych emocyj nie było. Paźniak nie ličyŭ siabie paetam, a tym bolš paetam-piesieńnikam. Ale hety vierš u jaho atrymaŭsia sapraŭdy prafiesijnym». Aranžyroŭku da «Ave Maria» zrabiŭ Mikałaj Sacura, muzyčny kiraŭnik «Siabroŭ», sam kampaziytar i virtuozny muzykant. Anatol Jarmolenka vykanaŭ asnoŭnuju vakalnuju partyju, a hołas chieruvima – jaho dačka Alesia, jakoj na toj čas było 15 hod. «Ave Maria» zapisali ŭ studyi i jana trapiła, jak ciapier kažuć, u ščylnuju ratacyju na radyjo.
Kampazicyja na publiku była pradstaŭlena na «Słavianskim bazary-1993», mastackim kiraŭnikom jakoha byŭ Uładzimier Mulavin. Jamu taksama pryjšłasia da spadoby hetaja kampazycyja. «Heta pieśnia była vielmi patrebnaja na toj čas. I jana pajšła ŭ śviet. Jaje vykonvali inšyja vykanaŭcy, dziciačy chor. Dahetul ja jaje čuju pa radyjo», - kaža spadar Anatol.
Sami «Siabry» nie hrajuć «Ave Maria» dosyć daŭno. Kiraŭnik «Siabroŭ» nia moža dakładna pryhadać apošniaje vykanańnie, ale bolš za 10 hod dyk dakładna. «Čas prachodzić, artysty padrastajuć i źmianiajucca, tamu niekatoryja pieśni vypadajuć z repiertuaru. Tak było i z hetym tvoram. Dla jaje vykanańnia byŭ nieabchodny dziciačy vakał. Viadoma ž, hołas Alesi ŭžo nie pasavaŭ. Ale kali my jaje nie vykonvajem, heta nie značyć, što tvor straciŭ aktualnaść», - padsumoŭvaje Anatol Jarmolenka.
