Supracoŭnikami kryminalnaha vyšuku MUS Rasii va ŭzajemadziejańni z kalehami sa Śviardłoŭskaj vobłaści, mihracyjnaj słužby RF, supracoŭnikami MUS Biełarusi pry padtrymcy bajcoŭ śpiecnazu rasijskaj milicyi zatrymany 40-hadovy biełaruski hramadzianin, tak zvany złodziej u zakonie, jaki maje kryminalnyja mianuški Aleh Słucki i Mumu (Aleh Hierasimovič), paviedamiła pres-słužba hałoŭnaha ŭpraŭleńnia MUS Rasii pa Śviardłoŭskaj vobłaści.
Pavodle źviestak supracoŭnikaŭ adździeła pa baraćbie z arhanizavanaj złačynnaściu hałoŭnaha abłasnoha palicejskaha ŭpraŭleńnia, hety hramadzianin prybyŭ u Śviardłoŭskuju vobłaść pryblizna dva miesiacy tamu na aŭtamabili. Jon nie mieŭ zakonnaj mahčymaści skarystać avija- i čyhunačny transpart — raniej byŭ departavany za miežy Rasii z adznakaj pra niepažadanaść znachodžańnia na praciahu piaci hadoŭ, da vieraśnia 2016 hoda.
Słucki-Hierasimovič pryjechaŭ u Rasiju, kab asabista prysutničać pry pieradziele śfier kryminalnaha ŭpłyvu paśla śmierci Cimury Mirzojeva pa mianušcy Cimur Śviardłoŭski. Čakajučy «partnioraŭ pa pieramovach», Mumu znachodziŭsia 28 krasavika ŭ 14.00 u kafe «Nika» na trasie Jekaciarynburh — Kamiensk-Uralski, dzie i byŭ zatrymany.
Pres-słužba adznačaje, što ŭ kryminalnym śviecie Słucki ličycca staŭlenikam złačynnaj hrupoŭki, jakaja znachodzicca ŭ prociborstvie z «kłanam» pamierłych Asłana Usajana i Cimury Mirzojeva. Mumu sprabavaŭ «zamacavacca» ŭ Śviardłoŭskaj vobłaści z krasavika 2013 hoda.
Jak adznačyŭ načalnik ABAZ HU MUS Rasii pa Śviardłoŭskaj vobłaści padpałkoŭnik palicyi Kanstancin Strohanaŭ, orhany ŭnutranych spraŭ i ŭ dalejšym buduć supraćstajać sprobam kryminalnych lidaraŭ ustanavić svaje paradku ŭ rehijonie. Praca pa dekryminalizacyi Siaredniaha Urała praciahvajecca.
Zaraz vyrašajecca pytańnie ab departacyi zatrymanaha ŭ Biełaruś.
