Adpačynak na biełaruskaj ahrasiadzibie dla hościa z Maskvy skončyŭsia kryminalnaj spravaj.
A pačałosia ŭsio z abjavy ŭ internecie ab adpačynku na ahrasiadzibie, jakaja znachodzicca na bierazie malaŭničaha voziera niedaloka ad Biełaviežskaj puščy. Pračytaŭšy jaho, kampanija maskvičoŭ vyrašyła ździejśnić vajaž u Biełaruś.
U vyniku da miesca adpačynku na troch mašynach sa stalicy Rasii prybyli ź dziasiatak čałaviek. Raskłaŭšy rečy, jany apieratyŭna nakryli stoł i pačali ŭžyvać śpirtnoje, pryčym u vialikaj kolkaści.
Adzin ź ich, 30-hadovy Dźmitryj Jahoraŭ chutka apjanieŭ, paśla čaho pačaŭ łajacca sa svajoj sužycielnicaj. Paśla psichanuŭ i vyjšaŭ z palaŭničaj chatki na vulicu. U hety momant jamu na vočy i trapiłasia «Piežo j5» tolki nahladčyka ahrasiadziby, jaki mieŭsia raspalić dla rasiejcaŭ łaźniu.
Jahoraŭ sieŭ u niezačynieny sałon čužoj mašyny, zavioŭ ruchavik i kranuŭsia ź miesca. Ubačyŭšy, što niećviarozy rasiejec źjazdžaje, nahladčyk kinuŭsia naŭzdahon, stukaŭ pa škle rukoj, sprabujučy pryvieści da rozumu hościa, ale ŭsio akazałasia daremnym. Praŭda, toj prajechaŭ niašmat. Nie bolš za paŭkiłamietra. Paśla nie daŭ rady kiravańniu i ŭrezaŭsia ŭ dreva.
U takoj situacyi zhonščyku treba było viarnucca dy pakajacca ŭ zroblenym. Ale jon pastupiŭ inakš. Puściŭsia na ŭcioki. Na dyziel-ciahniku dabraŭsia da Vaŭkavyska, dzie płanavaŭ vyznačycca z dalejšym maršrutam. Nie atrymałasia. Jak tolki jon vyjšaŭ z vahona, byŭ spynieny dla pravierki supracoŭnikami transpartnaj milicyi. Tyja z padazreńniem pastavilisia da brudnaha pjanaha pasažyra, jaki nie moh rastłumačyć, kudy i navošta rušyć.
Pa vynikach pravierki rajonny adździeł Śledčaha kamiteta raspačaŭ suprać Jahorava kryminalnuju spravu pa fakcie kradziažu. Akramia taho, na jaho skłali try pratakoły za ździajśnieńnie administracyjnych pravaparušeńniaŭ - kiravańnie aŭtamašynaj biez pravoŭ, u stanie apjanieńnia i ździajśnieńnie na joj DTZ.
