Akazałasia, nie ŭsie zaŭziatary ŭ zachapleńni ad matču i pavodzin brackich narodaŭ. 33-hadovy Viačasłaŭ — biełarus, u dziacinstvie jon žyŭ z baćkami ŭ Rasii. Ciapier žyvie ŭ Minsku, časta chodzić na apazicyjnyja mitynhi ź bieł-čyrvona-biełym ściaham. Fanat. Zaŭzieje za Biełaruś, ale na matč Biełaruś — Rasija chadziŭ pad rasiejskim ściaham u rasijskaj majcy. U hety raz chacieŭ i Rasiju padtrymać. Voś što jon raspavioŭ paśla matču.
«Atmaśfiera braterstva i adzinstva — heta było tolki da i padčas matču. Potym było realna strašna chadzić pa vulicy. Ja — ruski biełarus. Ale kali ŭčora pachadziŭ pa Minsku z rasiejskim ściaham, upieršyniu adčuŭ strach i ahresiju ad biełarusaŭ. Mianie i hrupu siabroŭ prymali za ruskich. Jak tolki my kryčali «Ros-si-ja! «, nam u adkaz časta danosiłasia: «Rasija — usim smaktać!» Ździviła, što heta nie z adnaho natoŭpu danosiłasia, a ŭ roznych častkach zony haścinnaści. Piva im, ci što, u hałavu ŭdaryła naprykancy matču? Mnohija sprabavali zadziracca, kryčali: «Valicie ŭ Rasiju». Palityku ŭ asnoŭnym nie čapali, ale byli ludzi, jakija kryčali ŭ tvar: «Chren vam, a nie aneksija Biełarusi».
Da Rasii pa-roznamu možna stavicca, ale ciapier rasiejcy siabie pavodzili našmat bolš kulturna. Čaplalisia da nas sami biełarusy — pieršyja! Heta talerantnaść? My kazali «Biełarusy — małajcy» i imknulisia syści. Chto dobrazyčlivy — zaŭsiody padychodzili i ruku cisnuli, ale mienavita paśla matču byŭ prosta napłyŭ ahresaraŭ. Padychodziać z chitraj uśmieškaj, i ty bačyš, što jamu tolki patrebnaja nahoda zaviazać sprečku. U dvary za «Hurmanam «, jaki na Niamizie, naš tavaryš ź Piciera chavaŭsia ŭ mašynie. Ź jaho mašyny pavydzirali z koraniem rasijskija ściahi!
Ździviła, što hetyja zadziraki usie byli tolki z čyrvona-zialonymi ściahami. Ciapier usiu krainu abjadnaŭ chakiej. Ja nikoli nie bačyŭ, kab małaletki, hulajučy, śpiavali biełaruski himn. U hetym płanie kraina pieramahła. Navat ultras i toje čyrvona-zialonyja ściahi ŭ ruki ŭziali. Bieł-čyrvona-bieły zaraz sapraŭdy na druhim płanie. Heta jadnańnie darahoha varta. Ale što da braterstva… Skłałasia adčuvańnie, što Biełaruś — kraina-prastytutka: bratajecca, a nožyk za śpinoj trymaje».
