Ciapier «Prajekt stancyi Kavalskaja Słabada Minskaha mietrapalitena» piacikurśnika Biełaruskaha nacyjanalnaha techničnaha ŭniviersiteta Jakuba Trafimoviča (fakultet transpartnych kamunikacyj) budzie realizoŭvacca na praktycy.
— Prajekt zaklučaŭsia ŭ tym, kab raźličyć budaŭničyja kanstrukcyi płatformavaha ŭčastka. Apisvałasia technałohija budaŭnictva, achova pracy, achova navakolnaha asiarodździa. Ale asnoŭnaje — heta raźliki.
«NN»: Jość vierahodnaść, što tvoj prajekt znojdzie praktyčnaje ŭvasableńnie?
Jakub Trafimovič: Tak, moj prajekt budzie realizoŭvacca. Z hetaj stancyi pačniecca budaŭnictva treciaj linii mietro. Ja ŭžo pracuju ŭ «Minskmietraprajekcie»: pakul dypłom nie atrymaŭ — ja tolki technik-prajekciroŭščyk. I tam zastajusia na raźmierkavańnie.
«NN»: Jak vykładčyki pryniali biełaruskamoŭny prajekt?
JAT: Napačatku byli pytańni. Maŭlaŭ, nikoli takoha nie było na śpiecyjalnaści (ale va ŭniviersitecie heta nie pieršy vypadak). Maŭlaŭ, pratakoł afarmlajecca pa-rusku, a moj prajekt budzie na biełaruskaj movie. U vyniku ŭsio prajšło vydatna. Na abaronie prysutničaŭ zahadčyk kafiedry, dyrektar «Minskmietraprajekta», supracoŭniki mietrapalitena. Pytańni staralisia zadavać taksama pa-biełarusku. Za dypłom ja atrymaŭ 9 bałaŭ.
«NN»: Čyja była inicyjatyva abaraniacca na rodnaj movie?
JAT: Ja tak sam vyrašyŭ, kali jašče pastupiŭ va ŭniviersitet. Ja dva kursavyja prajekty da hetaha pisaŭ pa-biełarusku.
«NN»: Jakija byli składanaści pry napisańni dypłoma?
JAT: U ahulnym dostupie niama techničnaj litaratury na biełaruskaj movie. Jość słoŭniki, ale prafiesijnaja terminałohija słaba raspracavana. Davodziłasia šukać pa sajtach, dapamahła karektarka, jakaja vyčytvała moj prajekt.
Prykład Jakuba Trafimoviča nie adzinkavy. Usio bolš studentaŭ techničnych VNU pryncypova abirajuć rodnuju movu. Raniej sioleta my pisali pra biełaruskamoŭnyja abarony inžyniera z HDTU i ekanamista z BDTU.
