Prezidyum Viarchoŭnaha suda Biełarusi admianiŭ rašeńnie kalehii pa spravach intelektualnaj ułasnaści Viarchoŭnaha suda pa isku Andreja Bielakova da telekanała «Biełsat». Sprava budzie adpraŭlena na paŭtorny razhlad.
Nahadajem, 27 studzienia kalehija pa spravach intelektualnaj ułasnaści Viarchoŭnaha suda Biełarusi admoviła ŭ zadavalnieńni isku ŭładalnika PTUP «BIEŁSATplus» Andreja Bielakova da kampanii Telewizja Polska, jakaja źjaŭlajecca ŭładalnikam telekanała «Biełsat».
Kalehija pryjšła da vysnovy, što iściec nie pradjaviŭ dokazaŭ parušeńnia jaho vyklučnych pravoŭ na tavarny znak BELSAT na terytoryi Biełarusi. U suviazi ź nieabhruntavanaściu patrabavańniaŭ u zadavalnieńni isku było vyrašana admović.
Bielakoŭ śćviardžaŭ, što telekanał «Biełsat» niezakonna vykarystoŭvaje svoj tavarny znak pry viaščańni na terytoryi Biełarusi, pakolki jon źjaŭlajecca «padobnym da stupieni źmiešvańnia» z tavarnym znakam istca.
Z samaha pačatku dyrektar pradpryjemstva zapatrabavaŭ spynić «niezakonnaje vykarystańnie» tavarnaha znaka adkazčyka ŭ prahramach telekanała i na jaho sajcie, a taksama abaviazać luksiemburhskuju kampaniju SIES S.A., jakaja vałodaje adpaviednym spadarožnikam, spynić viaščańnie telekanała na terytoryju Biełarusi.
20 studzienia iściec admoviŭsia ad svajho patrabavańnia spynić viaščańnie telekanała na terytoryju Biełarusi, paśla taho jak adzin z sudździaŭ ukazaŭ Bielakovu na supiarečnaść u jaho patrabavańniach — adsutnaść nieabchodnaści spynić viaščańnie telekanała ŭ vypadku, kali jaho pieršaje patrabavańnie budzie vykanana adkazčykam.
Bielakoŭ zajaviŭ, što prablemy ŭ jaho ŭźnikli ŭ suviazi z tym, što ludzi asacyjujuć tavarny znak jaho pradpryjemstva z telekanałam «Biełsat». Na pytańnie sudździ, u čym heta prajaŭlajecca, Bielakoŭ zajaviŭ: «Ludzi asacyjujuć nas z telekanałam, prychodziać jak da karespandentaŭ sa svaim horam, prapanovami. Heta pieraškadžaje nam pracavać».
