 |
Supiernikami byli adnahodki z San‑Maryna. Pierad hulnioj kamandy znachodzilisia na roznych polusach turnirnaj tablicy 8‑j adboračnaj hrupy. Biełarusy, majučy 12 punktaŭ, lidziravali ŭ joj, a San‑Maryna prajhrała ŭsie čatyry svaje matčy. Zbornyja ŭžo sustrakalisia ŭ pačatku leta na Apeninach, i biełarusy tady akazalisia macniej — 3:0.
Siońniašni matč całkam adpaviadaŭ turnirnamu stanovišču kamand, užo na pierapynak zbornyja sychodzili pry liku 4:0 na karyść našych chłopcaŭ. Hały zabivali Dźmitry Kamaroŭski (dvojčy), Michaił Afanaśjeŭ i Leanid Koviel. U druhim tajmie biełarusy supakoilisia i zabili tolki dvojčy. Trapnyja ŭdary na rachunku Alaksieja Kučuka i Alaksandra Dziehciarova. Finalny śvistok estonskaha sudździ Kaasika zafiksavaŭ na lik 6:0.
Turnirnaja tablica ŭ našaj hrupie vyhladaje nastupnym čynam: Biełaruś — 15 punktaŭ, Serbija — 10, Vuhorščyna — 9 , Łatvija — 4, San‑Maryna — 0.
Našy chłopcy praviali na adzin matč bolej - šeść - za supiernikaŭ. Paślazaŭtra łatyšy buduć prymać vuhorcaŭ. Z hrupy ŭ płej‑of vychodziać dźvie pieršyja kamandy.
Kamanda Jurja Kurnienina nastupny matč praviadzie 20 listapada doma z serbami, a skončyć adboračny cykł naleta 10 vieraśnia haściavoj hulnioj z Łatvijaj.
Nahadajem, što zaŭtra adboračny matč da čempijanatu Eŭropy‑2008 u Tyranie ź albancami syhraje i nacyjanalnaja zbornaja Biełarusi. Matč ŭ zapisie budzie tranślavać telekanał ONT.
