Praciahvajucca matčy 1/8 finału čempijanatu śvietu pa futbole.
Arhiencina zrobić usio mahčymaje, kab stać treciaj paŭdniovaamierykanskaj zbornaj u čverćfinale. Bielhijcy, jakim vydavali stolki kamplimientaŭ, pakul nie nadta natchniajuć svajoj hulnioj, choć i atrymali try zapar pieramohi.
Arhiencina – Šviejcaryja
Kaeficyjenty bukmiekieraŭ: Pieramoha Arhienciny — 1,53, ničyja — 4,0, pieramoha Šviejcaryi — 7,0.
Pačatak hulni: 19:00.
Historyja supraćstajańniaŭ: Kamandy sustrakalisia trojčy. Adna z hulniaŭ pryjšłasia na čempijanat śvietu 1966. Tady arhiencincy byli macniejšaja ź likam 2:0. Astatnija dźvie hulni byli tavaryskimi. U červieni 2007 hoda zafiksavanaja ničyja 1:1. A ŭ lutym 2012-ha Arhiencina znoŭ pieramahła alpijcaŭ 3:1.
Zorka matča: Lea Miesi (Arhiencina)
27-hadovy napadajučy «Barsiełony» dasiahaŭ mnohaha z kłubam (trochrazovy pieramožca Lihi čempijonaŭ, šaścirazovy čempijon Ispanii), atrymlivaŭ indyvidualnyja ŭznaharody (atrymlivaŭ niekalki razoŭ «Załaty miač» i «Załatuju bucu»), a voś sa zbornaj Arhienciny ździajśnieńni kudy bolš ścipłyja (majecca tolki pieramoha na Alimpijadzie). Jasna, što najlepšamu futbalistu sučasnaści Miesi chočacca hetuju niespraviadlivaść chutčej likvidavać.
Na hetym čempijanacie, zdajecca, što Miesi — adziny, chto ciahnie za saboj Arhiencinu. Z šaści hałoŭ svajoj kamandy na rachunku Miesi čatyry. Jon zabivaŭ usim supiernikam svajoj kamandy — Bośnii, Iranu i Nihieryi.
Miesi naradziŭsia nie ŭ stalicy, ale ŭ vialikim arhiencinskim horadzie Rasarya. Miž inšym, heta radzima najvialikšaha revalucyjaniera XX stahodździa Ernesta Če Hievary. Darečy, pachodžańnie ŭ Miesi italjanskaje. Mienavita z Apieninaŭ prodki futbalista pryjechali pa lepšaje žyćcio ŭ Arhiencinu.
Chłopčyk pačynaŭ hulać u małaviadomaj kamandzie «Hrandoli», jakuju treniravaŭ jahony baćka. Adnak u 11 hadoŭ Lea pastavili dyjahnaz «deficyt harmonu rostu».
Arhiencinski hrand «Ryvier Płejt» lačyć talenavitaha padletka admoviŭsia, a voś ispanskaja «Barsiełona» ŭkłała ŭ chłopca hrošy. I, mabyć, nie škadujuć zusim pra heta. Za 277 matčaŭ u «Barsiełonie» Miesi zabiŭ 243 hały. Fienamienalny bambardzir.
Praŭda, nadta vysokim Miesi tak i nie staŭ. Jahony rost 169 sm. I mianušku praz heta maje adpaviednuju — Błycha. Užo paśla taho jak Lea dabiŭsia pośpiechaŭ, jon apłaciŭ lačeńnie ad «deficytu harmonu rostu» dla 6-hadovaha marakanca Valida Kašaša, jaki maryć stać futbalistam.
U pryvatnym žyćci Miesi vielmi ścipły čałaviek. Jon intraviert, jakomu ciažka razmaŭlać navat pa telefonie, u bolšaści vypadkaŭ karystajecca sms-kami. Kali Miesi zabivaje hały, to padymaje abiedźvie ruki ŭhoru, tym samym salutujučy svajoj pamierłaj babuli. Arhienciniec vieryć, što jana bačyć jahonyja hały ź nieba.
Miesi ŭ adnosinach sa svajoj suajčyńnicaj Antanełaj Rakaza, u pary jość syn Ćjahu. Da hetaha Miesi sustrakaŭsia jašče ź niekalkimi dziaŭčatami.
Bielhija – ZŠA
Kaeficyjenty bukmiekieraŭ: Pieramoha Bielhii — 2,0, ničyja — 3,1, pieramoha ZŠA — 4,2.
Pačatak matča: 23:00.
Historyja supraćstajańniaŭ: Sustrakalisia trojčy. Pryčym debiutny raz na samym pieršym čempijanacie śvietu ŭ 1930-m hodzie va Uruhvai. ZŠA byli macniejšymi za bielhijcaŭ ź likam 3:0. U 2011 i 2013 hadach prachodzili dźvie tavaryskija sustrečy. Na hety raz jeŭrapiejcy byli macniejšymi — 1:0 i 4:2 adpaviedna.
Zorka matča: Klint Dempsi (ZŠA)
31-hadovy ŭradženiec štata Techas pravioŭ bolš za 100 matčaŭ za nacyjanalnuju zbornuju. Na hetym čempijanacie Dempsi adznačyŭsia dva razy: spačatku zabiŭ Hanie, a paśla Partuhalii. Tolki niemcy zmahli vyratavać svaje varoty ad biaźlitasnaj nahi amierykanskaha paŭabaroncy.
Ciapier Dempsi vystupaje za nie samy viadomy dla jeŭrapiejcaŭ kłub «Sietł Saŭnders». Ale załaty čas jahony pryjšoŭsia na vystupleńnie za anhlijski «Fułchem». Dempsi pravioŭ za hetuju kamandu piać siezonaŭ, zabiŭšy 50 hałoŭ. A voś u bolš krepkim «Totenchemie» hulnia ŭ amierykanca zusim nie pajšła. Dempsi ŭvajšoŭ u historyju jak pieršy amierykaniec, što zrabiŭ chiet-tryk u matčy anhlijskaj Premjer-lihi.
Dempsi naradziŭsia ŭ zusim biednaj amierykanskaj siamji, jakaja nie mahła dazvolić sabie ŭłasny dom, tamu žyła ŭ trejlernym parku. A hulać u futboł chłopčyk navučyŭsia ŭ mieksikanskich dziaciej.
U Klinta była siastra Dženifier, jakaja ŭ dziacinstvie pakazvała niakiepskija vyniki ŭ tenisie, ale pamierła ŭ šasnaccacihadovym uzroście ad chvaroby sasudaŭ. Dempsi ciapier pryśviačaje joj kožny svoj hoł.
Kažuć, što Dempsi maje vielmi žorstki charaktar. Nakolki žorstki? Jon pravioŭ niekalki hulniaŭ sa złamanaj skivicaj.
U 2006 hodzie Klint sumiesna sa svaim siabram, repieram XO, a taksama pry ŭdziele Big Hawk zapisaŭ sinhł «Don't Tread», u jakim Dempsi apisvaje svajo ciažkoje žyćcio i toje, jak futboł dapamoh jamu pieraadoleć ciažkaści. Naprykancy klipa Klint prynosić kvietki na mahiłu siastry. Klip maje na Jutubie amal 2 miljony prahladaŭ.
Prahnoz «NN»: Arhiencina vyjhraje Šviejcaryju ŭ asnoŭny čas. A voś u matčy Bielhija-–ZŠA budzie dadatkovy čas, a pa pienalci pieramohuć amierykancy.
