Minskaja padziemka nie pracavała try hadziny 26 lutaha. Jak paźniej paviedamili pravaachoŭniki, staličnaja studentka padhladzieła ŭ čužym mabilniku paviedamleńnie: mužčyna pisaŭ pra namier uzarvać mietro. Dziaŭčyna raskazała pra heta milicyjantu. Mietro ŭ vyniku začynili, a vybuchoŭku nie znajšli. A zatrymali 35-hadovaha uradženca Kazachstana.
Jak paviedamiŭ pradstaŭnik upraŭleńnia Śledčaha kamiteta pa Minsku Alaksandr Hierasimaŭ, tekst taho paviedamleńnia byŭ nastupny:
«u mienia bomba ja v mietro hdie vzorvať kod aktivacii podskaži».
Dziejańni padazravanaha kvalifikavany jak zahadzia łžyvaje paviedamleńnie pra vybuch, jaki rychtujecca, što stvaraje niebiaśpieku dla žyćcia i zdaroŭja ludziej, i paciahnuła naniasieńnie škody ŭ bujnym pamiery i inšyja ciažkija nastupstvy ŭ vyhladzie praciahłaha parušeńnia pracy hramadskaha transpartu. Škodu acanili bolš jak u 90 miljonaŭ rubloŭ.
«Padčas rasśledavańnia atrymany dadzienyja pra ździejśnienyja abvinavačanym inšyja złačynstvy: zhvałtavańnie zahadzia niepaŭnaletniaj, ździajśnieńnie inšych dziejańniaŭ seksualnaha charaktaru z asobaj, jakaja nie dasiahnuła 16-hadovaha ŭzrostu, a taksama demanstracyja zahadzia niepaŭnaletniamu videafilmaŭ parnahrafičnaha źmiestu,
— adznačyŭ Hierasimaŭ. — Pa mierkavańni ekśpiertaŭ, abvinavačany maje psichičnyja adchileńni ad normy. Ustanoŭleny fakty jaho złoŭžyvańnia ałkaholem. Razam z tym, jon pryznany zdolnym uśviedamlać faktyčny charaktar i hramadskuju niebiaśpieku ździejśnienych dziejańniaŭ, a taksama ŭ poŭnaj miery razumieć ich značeńnie i kiravać imi».
Mužčyna znachodzicca pad vartaj. Nakładzieny aryšt na jaho majomaść. Sprava pieradadziena prakuroru dla nakiravańnia ŭ sud.
