Padpisańnie 5 vieraśnia ŭ Minsku pratakoła ab urehulavańni situacyi va Ukrainie nie aznačaje lehitymizacyi tak zvanych Łuhanskaj i Danieckij narodnych respublik, zajaviŭ 9 vieraśnia na bryfinhu ŭ Kijevie dyrektar departamienta infarmacyjnaj palityki MZS Ukrainy Jaŭhien Pierabijnis.
«Važnym palityčnym aśpiektam źjaŭlajecca toje, što nazvanyja damoŭlenaści dasiahnutyja na pryncypach pavahi da suvierenitetu i terytaryjalnaj cełasnaści Ukrainy», — cytuje Pierabijnisa ŭkrainski resurs LIHABiźniesInform.
U pratakole, zaŭvažyŭ pradstaŭnik MZS, «nie zhadvajucca tak zvanyja ŁNR i DNR». «Hramadzianie Zacharčanka i Płatnicki («premjer-ministry» samaabvieščanych Danieckaj i Łuhanskaj narodnych respublik Alaksandr Zacharčanka i Ihar Płatnicki) padpisali pratakoł biez ukazańnia svaich pazicyj, tamu fakt padpisańnia hetaha pratakoła nijakim čynam nie aznačaje lehitymizacyju hetych niezakonnych hrupovak», — padkreśliŭ Pierabijnis.
Jon taksama adznačyŭ, što Rasija źjaŭlajecca bokam-padpisantam dasiahnutych damoŭlenaściaŭ, i heta «ŭskładaje na jaje pramuju adkaznaść» za ich vykanańnie. Padpisany ŭ Minsku pratakoł bazujecca na pałažeńniach mirnaha płana prezidenta Ukrainy Piatra Parašenki i ŭličvaje klučavyja pryjarytety Ukrainy va ŭrehulavańni kryzisu ŭ Danbasie, zajaviŭ Pierabijnis.
«Pieršačarhovaj metaj dasiahnutych damoŭlenaściaŭ źjaŭlajecca nieadkładnaje spynieńnie krovapralićcia i stvareńnie ŭmoŭ dla ŭrehulavańnia situacyi ŭ Danbasie. Ciapier raspracoŭvajecca darožnaja karta, jakaja budzie ŭtrymlivać praktyčnyja kroki pa vykanańni kožnaha punkta pratakoła», — skazaŭ pradstaŭnik MZS Ukrainy.
Pavodle słoŭ Pierabijnisa, akramia dvuchbakovaha spynieńnia ahniu i vyzvaleńnia załožnikaŭ jak pieršačarhovych krokaŭ, dalejšaja realizacyja damoŭlenaściej budzie zaklučacca ŭ zabieśpiačeńni efiektyŭnaha kantrolu nad ukrainska-rasijskaj miažoj, vyviadzieńni rehularnych rasijskich vojskaŭ, vajennaj techniki i bajavikoŭ z terytoryi Ukrainy, a taksama źniaćci terarystami pieraškodaŭ dla dostupu humanitarnych hruzaŭ na časova padkantrolnaj im terytoryi.
Nahadajem, napiaredadni były premjer-ministr Ukrainy, kandydat u prezidenty na daterminovych vybarach 2014 hoda Julija Cimašenka zajaviła, što padpisany ŭ Minsku pratakoł ab časovym pieramirji na ŭschodzie Ukrainy nadzvyčaj niebiaśpiečny dla terytaryjalnaj cełasnaści krainy.
Jana, u pryvatnaści, adznačyła, što ŭ dakumiencie niama patrabavańnia vyvadu rasijskich vojskaŭ z terytoryi Ukrainy. «A heta de-fakta aznačaje ich zamacavańnie na našaj terytoryi», — miarkuje Cimašenka. Akramia taho, u pratakole «pryznanyja nieviadomyja farmiravańni — ŁNR, DNR — jak aficyjny bok, jaki ich padpisaŭ». «Jak vynik, chtości moža vyrašyć, što Ukraina pryznała, što jana viadzie hramadzianskuju vajnu», chacia, na dumku Cimašenki, «ŁNR, DNR nie isnujuć de-fakta, isnuje ahresija Rasijskaj Fiederacyi, jakaja abviaściła Ukrainie vajnu».
Nahadajem, pratakoł ab urehulavańni situacyi va Ukrainie, jaki składajecca z 12 punktaŭ, byŭ padpisany 5 vieraśnia ŭ Minsku na pasiadžeńni kantaktnaj hrupy ŭ farmacie Rasija — Ukraina — ABSIE — sieparatysty Danbasa. Paviedamlałasia, što ŭdzielniki pieramoŭ damovilisia sabracca praź siem-vosiem dzion.
