Viasnoju 1930 h. baćku (jamu išoŭ 12 hod) razam ź siamjoju vysłali ŭ Kotłas. Ale praz paŭhoda (ci krychu bolš) dziaciej ułady vyrašyli viarnuć u rodnyja miaściny (baćka navat śćviardžaŭ, što było heta zroblena pa patrabavańni anhlijskaha Čyrvonaha Kryža). Darečy, pra padobnaje viartańnie apaviadaŭ u svaich «Uspaminach litaraturaznaŭca» Anton Siemianovič (1917—2000).
Žyŭ u svajakoŭ. Zakončyŭšy siamihodku, pačaŭ vučycca na nastaŭnickich kursach, ale ŭ chutkim časie byŭ vyklučany jak syn voraha naroda.
Dalejšy jahony los, akazvajecca, vyznačyli vysokija partyjnyja čyny. 9 lipienia 1937 h. Vasil Šaranhovič, adkazvajučy, vidać, na patrabavańnie t. Stalina, napisaŭ nastupnaje: «… nami ŭličana raniej vysłanych, ale jakija viarnulisia kułakoŭ i kryminalnikaŭ u Biełarusi 12.800 čałaviek, z hetaje kolkaści prapanujem rasstralać 3 tys. čałaviek, jak najbolš varožych, što viaduć aktyŭnuju kontrrevalucyjnuju rabotu, i vysłać za miežy Biełarusi 9.800 čałaviek mienš aktyŭnych, ale varožych elemientaŭ» (dakumient z błoha H.Łabadzienki).
Baćku aryštavali 18 lipienia 1937 h. U hrupu «najbolš varožych» jon nie trapiŭ. Byŭ adno asudžany 7 žniŭnia 1937 h. na 10 hadoŭ. U studzieni 1944 h. jamu dadali jašče 2 hady.
Usiaho na lesaraspracoŭkach Komi ASSR adbyŭ 11 hadoŭ 2 miesiacy i 7 dzion.
Vyzvaleny 25 vieraśnia 1948 h. «Zaroblenych» 165 rub. 38 kap. chapiła na bilet da Słucka. Pryvioz na radzimu hramatu («Kto rabotajet siehodnia chorošo — zavtra dołžien rabotať łučšie») i chvaroby, ad jakich i pamior u 69 hadoŭ.
Reabilitavali baćku praz dva hady paśla śmierci. Ułady BSSR, adnak, nie paličyli patrebnym paviedamić pra rašeńnie prakuratury Minskaj vobłaści siamji.