Jeŭrapiejski bank rekanstrukcyi i raźvićcia nie vyklučaje mahčymaści ŭniasieńnia źmianieńniaŭ u krainavuju stratehiju supracoŭnictva ź Biełaruśsiu, zajaviŭ 26 vieraśnia na pres-kanfierencyi ŭ Minsku kiraŭnik delehacyi savieta dyrektaraŭ JEBRR Šon Donłan.
Delehacyja savieta dyrektaraŭ JEBRR znachodziłasia ŭ Biełarusi ź piacidzionnym vizitam. Adbylisia sustrečy z pradstaŭnikami ŭłady, zamiežnymi i miascovymi inviestarami, a taksama pradstaŭnikami niaŭradavych arhanizacyj, na jakich abmiarkoŭvałasia ekanamičnaje raźvićcio krainy.
«Što da mahčymaha pierahladu krainavaj stratehii, to heta rehularny štohadovy praces dla kožnaj krainy — člena JEBRR. U tym liku budziem analizavać mahčymaść pierahladu krainavaj stratehii dla Biełarusi ŭ chutkim časie», — skazaŭ Šon Donłan.
Kiraŭnik delehacyi savieta dyrektaraŭ JEBRR taksama zaznačyŭ, što na sustrečy z prem`ier-ministram Biełarusi Michaiłam Miaśnikovičam 26 vieraśnia «daŭ jasna zrazumieć, što chacieŭ by bačyć bolš inviestycyj JEBRR u Biełarusi». «Tamu my sa svajho boku pracujem ź miascovym pradstaŭnictvam banka dla stvareńnia prajektaŭ. Paśla taho jak prajekty buduć maksimalna detalizavanyja i abmierkavanyja, dzie heta treba, adpaviednymi orhanami ŭłady, hetyja prajekty buduć vyniesieny na abmierkavańnie savieta dyrektaraŭ JEBRR», — rastłumačyŭ Šon Donłan.
«Prajekt moža być zaćvierdžany abo nie, ale tym nie mienš usie temy ŭzajemadziejańnia abmiarkoŭvajucca z uładami Biełarusi, ź jakimi ŭ nas skłalisia cudoŭnyja adnosiny. My hatovyja zrabić usio, što jany chacieli b ad nas, ale — znoŭ ža — my pavinny supastaŭlać patrebnaści našych klijentaŭ z našymi mahčymaściami», — padkreśliŭ kiraŭnik delehacyi savieta dyrektaraŭ JEBRR.
Pryniataja ŭ 2013 hodzie trochhadovaja krainavaja stratehija JEBRR u Biełarusi nie praduhledžvaje pramuju finansavuju padtrymku biełaruskaj dziaržavie i abmiažoŭvajecca padtrymkaj infrastrukturnych municypalnych prajektaŭ.
Hnutki padychod dazvalaje JEBRR unosić u svaju pracu karektyvy ŭ vypadku pryniaćcia rašeńniaŭ, jakija mohuć paŭpłyvać na dasiahnieńnie klučavych palityčnych ci ekanamičnych metaŭ, prapisanych u mandacie banka dla ŭsich krain apieracyj. «Heta značyć, što mahčymaść pavieličeńnia ab`iomu dapamohi JEBRR zvyš zajaŭlenaha ŭ novaj stratehii budzie zaležać ad dziejańniaŭ biełaruskich uład», — tłumačać u banku.
Taksama JEBRR bačyć mahčymaści dla pašyreńnia dziejnaści ŭ Biełarusi.
«My miarkujem, što jość mahčymaści dla pašyreńnia našaj dziejnaści navat va ŭmovach kalibrovačnaha padychodu», — cytuje pres-słužba Donłana. «Niahledziačy na kalibrovačnuju stratehiju, pradstaŭniki banka byli ŭražanyja vynikami, jakija demanstrujuć sumiesnyja prajekty», — dadaŭ jon.
Pavodle słoŭ Donłana, delehacyja JEBRR prybyła ŭ Biełaruś, kab vysłuchać prapanovy biełaruskaha boku i razhledzieć ich na pasiadžeńni poŭnaha savieta dyrektaraŭ, pryznačanaha na nastupny tydzień.
Miaśnikovič, sa svajho boku, zaznačyŭ, što Biełaruś znachodziłasia la vytokaŭ stvareńnia JEBRR i stała adnym ź pieršych jaho členaŭ. U Biełarusi z bankam było šmat bujnych sistemnych prajektaŭ, u tym liku ŭ śfiery darožnaha budaŭnictva, suviazi, enierhietyki. Kiraŭnik urada padkreśliŭ, što «ahulny abjom kredytavańnia źjaŭlajecca niemałym, adnak jon moh być i bolšym».
Pavodle słoŭ Miaśnikoviča, prajektaŭ stała mienš i sumy kredytaŭ bolš ścipłymi. «Na moj pohlad, pryčyna ŭ tym, što bank kirujecca kalibrovačnym padychodam, i heta źnižaje našy mahčymaści supracoŭnictva», — miarkuje Miaśnikovič. Premjer-ministr vykazaŭ nadzieju, što jaho mierkavańnie budzie pačuta i ŭličana ŭ pracy JEBRR.
Miaśnikovič zajaviŭ, što ŭrad sumiesna z Nacbankam pastupova realizuje strukturnyja reformy ŭ ekanomicy. «Miarkuju, što resursy banka mohuć być dobraj padmohaj u realizacyi hetych pracesaŭ», — skazaŭ premjer-ministr.
***
JEBRR ź`iaŭlajecca bujnym inviestaram u Biełarusi. Pa stanie na 1 vieraśnia 2014 hoda bank vydzieliŭ bolš jak 1,5 miljarda jeŭra ŭ miežach 66 prajektaŭ, ź ich 883 miljony jeŭra byli inviestavanyja za minułyja piać hadoŭ.
Jeŭrapiejski bank rekanstrukcyi i raźvićcia — mižnarodnaja finansavaja arhanizacyja sa štab-kvateraj u Łondanie, stvoranaja dla padtrymki transfarmacyi ekanomiki ŭ dziaržavach Centralnaj i Uschodniaj Jeŭropy. JEBRR pačaŭ dziejničać u krasaviku 1991 hoda.
Asnoŭnyja akcyjaniery banka — ZŠA, krainy Jeŭrapiejskaha sajuza, Japonija. Biełaruś ź`iaŭlajecca paŭnapraŭnym členam JEBRR z 1992 hoda. Z 1994 hoda ŭ krainie adkryta pastajannaje pradstaŭnictva banka. 31 sakavika 2014 hoda adbyłosia aficyjnaje adkryćcio novaha ofisa banka ŭ Minsku.