 |
Na pačatak śniežnia ŭkłady nasielnictva respubliki ŭ biełaruskich bankach u pierarazliku na nacyjanalnuju valutu ŭpieršyniu pierasiahnuli miažu ŭ 10 tryljonaŭ rubloŭ, paviedamiŭ karespandentu «Źviazdy» pres‑sakratar Nacyjanalnaha banka Biełarusi Michaił Žuravovič.
Z pačatku hetaha hoda ŭkłady pavialičylisia amal na 2,3 tryljona rubloŭ, abo na 29,2 pracenta. Heta pry tym, što asnoŭnymi napramkami hrašova‑kredytnaj palityki praduhledžvałasia, što ŭkłady nasielnictva pavialičacca za hod na 1,7—2 tryljony. Na pačatak śniežnia ŭ nacyjanalnaj valucie ŭkłady skłali 6,4 tryljona rubloŭ, a ŭ zamiežnaj — 1,7 miljarda dołaraŭ ZŠA.
Biełarusy addajuć pieravahu biełaruskamu rublu, tamu što nie pieršy hod pravodzicca i ŭ dalejšym zastaniecca niaźmiennaj pracentnaja palityka, jakaja nakiravana na zabieśpiačeńnie bolš pryvabnych umoŭ pa źbieražeńniach mienavita ŭ biełaruskich rublach. Heta značyć, pracentnaja staŭka rublovaha ŭkładu pavinna prynosić układčyku bolšy dachod, čym zachoŭvańnie valutnaha ŭkładu.
Pavodle apošnich danych, na 1 śniežnia ŭ siarednim na adnaho biełarusa prychodziłasia 1 miljon 55 tysiač rubloŭ va ŭkładach, abo ŭ dołaravym ekvivalencie — 490,2 dołara ZŠA. Uzhadaju, što na pačatak hoda — 1 studzienia — u siarednim na adnaho žychara respubliki prychodziłasia 820 tysiač rubloŭ źbieražeńniaŭ, što było ekvivalentna 384,6 dołara. Taki rost śviedčyć pra toje, što ludzi daviarajuć pracentnaj palitycy, što pravodzić hałoŭny bank. Da taho ž, zaznaču, aktyŭnaść u pryciahnienni srodkaŭ prajaŭlajuć i banki, jakija pastajanna ŭdaskanalvajuć svaju rabotu: jany adkryvajuć nie tolki novyja vidy ŭkładaŭ na pryvabnych umovach, ale i madyfikujuć dziejučyja vidy depazitaŭ.
