U paraŭnańni ź letašnim daśledavańniem, pakazčyki jakoha byli pieraličanyja, miesca Biełarusi nie źmianiłasia, paviedamiła žurnalistam śpiecyjalist pa raźvićci pryvatnaha siektara hrupy Suśvietnaha banka Valancina Sałtanie.
Pavodle jaje słoŭ, pieralik letašnich pakazčykaŭ źviazany z uniasieńniem źmienaŭ u mietadałohiju daśledavańnia.
Razam z tym, padkreśliła Sałtanie, u paraŭnańni ź letašnim daśledavańniem prykmietna palepšyłasia pazicyja Biełarusi pa padatkaabkładańni. Kali ŭ pieraličanym daśledavańni Doing Business — 2014 Biełaruś zajmała 107-je miesca, to ŭ novym — 60-je.
Palapšeńnie pazicyi Biełarusi ŭ rejtynhu pa hetym paramietry aŭtary daśledavańnia tłumačać ukaranieńniem u krainie elektronnaj sistemy vypłaty padatkaŭ. «U Biełarusi była praviedzienaja reforma, jakaja ŭkaraniła elektronnuju sistemu dla vypłaty padatkaŭ. Hetaja reforma była realizavanaja ŭ Biełarusi ŭ 2012 hodzie, adnak indykatar pa padatkaabkładańni, jaki raźličvajecca ŭ miežach daśledavańnia, uličvaje reformu, kali stali viadomyja vyniki jaje praviadzieńnia», — rastłumačyła Sałtanie.
Da momantu padrychtoŭki Doing Business — 2015, udakładniła jana, pastupiła infarmacyja pra toje, što «bolšaść pradpryjemstvaŭ vykarystoŭvajuć elektronnuju sistemu vypłaty padatkaŭ i što sistema pracuje biez zbojaŭ». «U vyniku reforma była zaličanaja», — zaznačyła Sałtanie.
Pry hetym jana dadała, što inšych reform, jakija mahli palepšyć rejtynh Biełarusi ŭ daśledavańni, pry padrychtoŭcy Doing Business — 2015 zaŭvažana nie było. «Inšych reform, jakija mahli b paŭpłyvać na rejtynh Biełarusi, my nie zmahli zafiksavać», — kanstatavała Sałtanie.
Nahadajem, apošnimi hadami biełaruski ŭrad nieadnarazova zajaŭlaŭ pra namier Biełarusi ŭvajści ŭ tryccatku krain z najlepšymi ŭmovami viadzieńnia biźniesu. Z hetaj metaj Savietam ministraŭ byŭ zaćvierdžany płan dziejańniaŭ pa palapšeńni ŭmoŭ viadzieńnia biźniesu ŭ krainie.
Daśledavańnie Doing Business aceńvaje jakaść rehulavańnia biźniesu ŭ 10 śfierach, u jakich pracujuć małyja i siarednija pradpryjemstvy. U pryvatnaści daśledavańnie achoplivaje nastupny pytańni: stvareńnie pradpryjemstvaŭ; atrymańnie dazvołu na budaŭnictva; rehistracyja ŭłasnaści; atrymańnie kredytaŭ; achova pravoŭ minarytarnych inviestaraŭ; padatkaabkładańnie; ažyćciaŭleńnie źniešniehandlovaj dziejnaści.
