Rabotniki ŭpraŭleńnia apieratyŭnaha reahavańnia Dziaržaŭnaj inśpiekcyi pa achovie žyviolnaha i raślinnaha śvietu na terytoryi Kaściukovickaha rajona (Mahiloŭskaja vobłaść) zatrymali 11 hramadzian Rasii.
Jak paviedamlaje Dziaržaŭnaja inśpiekcyja pa achovie žyviolnaha i raślinnaha śvietu, 26 śniežnia rasijanie palavali ŭ zabaronienym miescy — u zonie adsialeńnia i adčužeńnia. U parušalnikaŭ kanfiskavanyja try palaŭničyja karabiny i vosiem strelbaŭ, tam ža na miescy palavańnia znojdziena niezarehistravanaja strelba. Vyrašajecca pytańnie ab raspačynańni kryminalnaj spravy za niezakonnaje palavańnie. Žychary RF arhanizavali na terytoryi Biełarusi zahonnaje palavańnie. Pryjechali ŭ «zonu adčužeńnia» na mašynach i koniach.
Heta nie pieršy vypadak brakańjerstva rasijanami na biełaruskaj terytoryi, u tym liku zabrudžanaj radyjenuklidami. Tak, u krasaviku 2014 hoda pjanyja rasijanie, jakija pryjechali ŭ Biełaruś na palavańnie, sprabavali schavacca ŭ Łojeŭskim rajonie ad supracoŭnikaŭ DAI. Padčas zatrymańnia jany prataranili słužbovy aŭtamabil milicyi.
U 2013 hodzie žychary susiedniaj krainy ŭčynili bojku i pahoniu ź inśpiektarami achovy pryrody ŭ Homielskaj vobłaści. Rasijanie zastrelili ŭ zonie adčužeńnia i adsialeńnia łasia i kabana, a zatym akazali žorstkaje supraciŭleńnie rabotnikam achovy pryrody. Śniehachod brakańjeraŭ byŭ paškodžany, tamu jany pasprabavali zavałodać słužbovym. Na dvuch mužčyn byli nadziety naručniki. Dva inśpiektary zastalisia achoŭvać zatrymanych, a dvoje druhich pajechali sustrakać apieratyŭna-śledčuju hrupu. Praź niekatory čas na miesca zatrymańnia pryjechali saŭdzielniki zatrymanych. U vyniku adzin z zatrymanych uciok. Za niezakonnaje palavańnie ŭ zonie radyjacyjnaha adčužeńnia brakańjer-rasijanin byŭ pryhavorany da dvuch z pałovaj hadoŭ pazbaŭleńnia voli z adbyvańniem pakarańnia ŭ kałonii ahulnaha režymu.
