Dzimu Jermuzieviču z Homiela 16 hadoŭ. Na siońnia jaho videa na YouTube prahladzieli amal 10 miljonaŭ čałaviek, siarod biełarusaŭ jon na druhim miescy pa kolkaści padpisčykaŭ «UKantakcie» paśla Maksa Karža. «Naša Niva» raspytała Dzimu pra papularnaść i sakrety jaje dasiahnieńnia.
«Zaŭsiody, kolki siabie pamiataju, ja vielmi lubiŭ zdymać i redahavać videa, rabiŭ videa dla siabroŭ, dla škoły, – uzhadvaje Dzima. A potym ja daviedaŭsia pra videabłohieraŭ i pra YouTube. Tady, niedzie ŭ 2011 hodzie, ja staŭ zdymać dla svajho kanała».
Na samym papularnym videa Dzimy jon i jaho siabroŭka Naścia zadajuć adno adnamu pytańni, a za niapravilny adkaz raźbivajuć jajka ab hałavu tamu, chto prajhraje. Na inšych videa jon dureje, tančyć, viesieła raspaviadaje pra siabie, abmiarkoŭvaje kino…
Samaje papularnaje videa Dzimy:
«Jak tady, tak i ciapier ja zdymaju tamu, što heta mnie vielmi padabajecca, ja lublu redahavać, nakładać na videa efiekty, muzyku. Heta prynosić mnie asałodu», – tłumačyć Dzima.
Zdymać videa ź siabrami jamu viesialej, čym rabić videa pra samoha siabie: «Kali my bačymsia ź siabrami, «davajcie zdymiem videa» staić na adnym miescy z «davajcie pahladzim film abo schodzim u kaviarniu», jak adzin z varyjantaŭ viasiołaha baŭleńnia času».
Ciapier na jaho kanał na Youtube padpisana 200 ź lišnim tysiač čałaviek. Plus da taho amal 100 tysiač na «UKantakcie», 91 tysiača u Instagram dy 25 tysiač u Twitter. Asnoŭnaja častka jaho hledačoŭ na Youtube — dziaŭčaty, ich kala 80%. Astatnija 20% — chłopcy va ŭzroście ad 13 da 18 hadoŭ.
Jaho kanał staŭ asabliva papularnym kala hoda tamu. «Napeŭna, heta źviazana z tym, što, pačynajučy ź minułaha hoda, ja staŭ bolš surjozna stavicca da videabłohinhu, značna čaściej i bolej zdymaŭ, čym raniej», – miarkuje Dzima.
U asnoŭnaj masie jaho padpisanty – vypadkovyja ludzi, jakija sami znachodziać jaho videa. «Hvałtoŭna ja nikoha siabie hladzieć nie prymušaju, – śmiajecca jon. — Dla mianie kaštoŭnaść nie ŭ kolkaści hledačoŭ, a ŭ jakaści. Niachaj ich budzie mienš, ale heta buduć tyja ludzi, jakim cikava, a nie tyja, chto vypadkova pahladzieŭ videa ad rassyłki».
Sustreča z fanatami ŭ Minsku:
Da svajho zaniatku jon nie stavicca jak da karjery: «Tak, ni dla kaho nie sakret, što videabłohinh prynosić prybytak. Heta vielmi kruta, ale asabista dla mianie jon nikoli nie zmoža stać asnoŭnaj pracaj. Užo zusim chutka ja budu pastupać u vyšejšuju navučalnuju ŭstanovu, dzie budu vučycca na režysuru kino i telebačańnia. Heta vielmi blizka da majho chobi, čamu ja rady, bo chaču ad svajoj pracy ŭ budučyni atrymlivać zadavalnieńnie! A vučobu i videabłoh — tak, pryjdziecca sumiaščać».
Darečy, Dzima taksama śpiavaje:
Rabočyja instrumienty zorki Youtube – kamiera Canon 600D i videaredaktar Sony Vegas Pro. A rabočyja sakrety?
«Ja nie liču svoj kantent aryhinalnym, takich jak ja na Youtube proćma, — pryznajecca jon. — Ale mnie ludzi časta kažuć, što ja padymaju nastroj, daju pazityŭ. Moža, sprava ŭ hetym. Ja nie bajusia pavodzić siabie pierad kamieraj niejak niedarečna, śmiešna. Samaje hałoŭnaje — być ščyrym, być samim saboj pierad kamieraj. Čym praściej siabie pavodziš — tym lepiej. Usie lubiać lohkich ludziej. Nu i samaironija — heta adno z hałoŭnych jakaściej videabłohiera. Biez hetaha nijak, treba ŭmieć śmiajacca ź siabie».
Zaraz Dzima choča pierajechać u Minsk, vučycca ŭ stalicy. Jon ličyć, što razam ź im budzie mianiacca, staleć i jaho videabłoh: «Ja nie rabiŭ ź siabie piersanaža, nie vydaju siabie za kahości inšaha. Na Youtube ja — heta ja».
Čytajcie taksama: Samyja papularnyja biełarusy «UKantakcie»: chto jany i chto ich čytaje
