«Nakolki my viedajem, rašeńnie Bałonskaj rabočaj hrupy stanoŭčaje. Chutčej za ŭsio, Biełaruś budzie rekamiendavanaja da pryniaćcia ŭ jeŭrapiejskuju prastoru vyšejšaj adukacyi», — paviedamiŭ siońnia siabra Hramadskaha Bałonskaha kamiteta Uładzimir Dunajeŭ.
eastbook.eu
Ekśpiert adznačyŭ, što šancy ŭstupić u Bałonski praces u Biełarusi vielmi vysokija. I choć «heta rašeńnie praktyčna kančatkovaje», apošniaje słova budzie skazana na samicie ministraŭ adukacyi 14-15 maja ŭ Jerevanie.
23-24 sakavika ŭ Ryzie prachodzić pasiadžeńnie Hramadskaha Bałonskaha kamiteta.
Bałonskaja rabočaja hrupa padrychtavała da mierapryjemstva alternatyŭny dakład. U im paznačana, što, niahledziačy na bačny prahres, pa asnoŭnych kaštoŭnaściach Bałonskaj sistemy istotnych zruchaŭ u Biełarusi nie nazirajecca, raspavioŭ Uładzimir Dunajeŭ. Pytańni zastajucca da instytucyjnaj aŭtanomii, akademičnych svabod i studenckaha ŭdziełu ŭ kiravańni VNU, paviedamlaje ekśpiert. Darečy, pa hetych ža punktach u Bałonski praces Biełaruś nie pryniali ŭ minuły raz — try hady tamu.
Stanovišča z aŭtanomijaj VNU, svabodami i ŭdziełam studentaŭ zastałosia biez bačnych zruchaŭ, i da hetaha času hetyja kaštoŭnaści adzinaj jeŭrapiejskaj prastory nie byli ažyćcioŭlenyja ŭ biełaruskim zakanadaŭstvie. «Bolš za toje, my adznačajem uzmacnieńnie akademičnych represij», — kaža Dunajeŭ.
«Propusk u Bałonski praces razhladajecca siońnia jak raźmiennaja manieta, — kaža Uładzimir Dunajeŭ. — Idzie handal pamiž Biełaruśsiu i Jeŭropaj. Jeŭropa hatovaja zrabić taki žest. Maŭlaŭ, navat, niahledziačy na toje, što vy nie adpaviadajecie patrabavańniam, my vas prymajem u Bałonski praces, kab zaśviedčyć svaju zacikaŭlenaść u jeŭrapiejskim viektary raźvićcia Biełarusi. Heta vielmi drenna, tamu što heta palityzacyja rašeńnia. Ź inšaha boku, heta apraŭdana dla hieapalityčnych metaŭ».
Płanujecca, što ŭ jakaści dapaŭnieńni razam z rašeńniem ab pryniaćci Biełarusi ŭ Bałonski praces budzie zaćvierdžana darožnaja karta pryncypaŭ, metaŭ, kaštoŭnaściaŭ i asnoŭnych nakirunkaŭ adukacyjnaj palityki. «Praces ustupleńnia pavinien supravadžacca vykanańniem peŭnych umoŭ ad Biełarusi i Ministerstva adukacyi, i patrabavańni pavinny być uvasoblenyja ŭ čymści nakštałt darožnaj karty, raspracavanaj sumiesna biełaruskimi i jeŭrapiejskimi ekśpiertami», — kaža Dunajeŭ.
Jak adzin z punktaŭ darožnaj karty Hramadski bałonski kamitet prapanavaŭ unieści źmieny ŭ Kodeks ab adukacyi. «U kodeksie jak minimum abaviazanyja być takija słovy, jak studenckaje samakiravańnie, akademičnaja svaboda, univiersiteckaja aŭtanomija. Pavinny źjavicca i artykuły, jakija realna harantavali b usio heta».
Razam z tym, adznačaje ekśpiert, niedachop Bałonskaha pracesu — adsutnaść žorstkaha kantrolu za tym, jak krainy-členy vykonvajuć ahulnapryniatyja rašeńnia. «Niama instrumientaŭ paśla ŭstupleńnia krainy paŭpłyvać na biełaruskuju sistemu vyšejšaj adukacyi. Nielha prymusić ministra vykonvać praviły», — kaža Dunajeŭ.
