U redakcyju «IK» źviarnułasia słuččanka Ała Jurjeŭna. Jana raspaviała, što niespadziavana vypuściła tualetnuju vadu ŭ kramie z ruk, fłakon raźbiŭsia i ź jaje zapatrabavali płatu. Čytačka cikavicca: u jakim vypadku pakupnik pavinien płacić za raźbity tavar?
«Ja padyšła da palicy, uziała ŭpakoŭku z parfumaj u ruki, — patłumačyła čytačka. — Upakoŭka ŭ rukach zastałasia, a voś fłakon vypaŭ. Atrymlivajecca, što chtości da mianie raspakavaŭ tavar. Pradaŭcy paprasili zapłacić za vadu, jakaja kaštavała 24 tysiačy rubloŭ. Nichto ź piersanału nie pacikaviŭsia, ci nie paraniłasia ja škłom».
Redakcyja «IK» paprasiła śpiecyjalistaŭ upraŭleńnia abarony pravoŭ spažyŭcoŭ i kantrolu za rekłamaj Ministerstva handlu dapamahčy našaj čytačcy razabracca, chto maje racyju, a chto vinavaty.
Situacyja pieršaja: raźbili praź niazhrabnaść
Va ŭpraŭleńni rastłumačyli, što ŭ punkcie 14 Praviłaŭ ažyćciaŭleńnia roźničnaha handlu asobnymi vidami tavaraŭ i hramadskaha charčavańnia napisana: «Pakupnik, dapuściŭšy psavańnie majomaści pradaŭca, abaviazany pakryć naniesienuju škodu». Tamu kali vy ŭziali tavar u ruki i pa ŭłasnaj niazhrabnaść jaho raźbili, to pryjdziecca płacić.
Situacyja druhaja: šturchnuŭ inšy pakupnik
Śpiecyjalisty ŭpraŭleńnia zaŭvažyli, što na praktycy mohuć być i inšyja vypadki. Naprykład, vas šturchnuŭ inšy pakupnik, i heta pasłužyła pryčynaj taho, što tavar raźbiŭsia. Ci prybiralščyca prosta pierad vami «prajšłasia» pa padłozie mokraj anučaj, vy paśliznulisia i ŭpali na vitrynu sa šklanymi kubkami.
U pieršym vypadku ŭ paškodžańni majomaści budzie vinavaty inšy pakupnik. U druhim — sama krama.
«Ale ŭ abodvuch vypadkach vam varta napisać skarhu ŭ knihu zaŭvah i prapanoŭ i paprasić administracyju kramy razabracca ŭ situacyi», — rastłumačyli va ŭpraŭleńni.
Na zapisach kamier videanazirańnia budzie vidać, kali vas niechta šturchnuŭ. Pry hetym treba pamiatać, što isnujuć narmatyvy, jakija rehulujuć šyryniu prachodaŭ u kramie — nie mienš za 1,4 mietra. Na heta taksama varta źviarnuć uvahu. Kali hetyja normy nie vykananyja, to pakupnik ni ŭ čym nie vinavaty.
Niališnim budzie sfatahrafavać šyryniu prachodaŭ i mokruju padłohu (kali jana takoj była), kab u budučyni vam było praściej dakazać svaju pravatu.
Situacyja treciaja: upaŭ raspakavany tavar
U vypadku z čytačkaj tavar byŭ raspakavany da jaje. To bok cełasnaść pradukcyi parušanaja, što taksama niedapuščalna.
Što rabić?
Śpiecyjalisty ŭpraŭleńnia handlu ŭ sprečnych vypadkach rajać pavodzić nastupnym čynam:
1. paklikać zahadčyka kramaj i rastłumačyć, što vy nie vinavatyja ŭ paškodžańni tavaru.
2. Kali vam nie pavieryli na słova, to zapłacicie za tavar, pakińcie sabie ček i napišycie skarhu z usimi pretenzijami.
3. Niališnim budzie zapisać numar telefona kaho-niebudź z pakupnikoŭ, jakija hatovyja śviedčyć na vašu karyść. U skarzie ŭkažycie, što chočacie, kab krama razabrałasia ŭ sprečnaj situacyi.
4. Čakajcie adkazu (ad dvuch tydniaŭ da miesiaca). Kali krama paličyć, što nie pa vašaj vinie tavar raźbiŭsia, to vam viernuć hrošy. Kali ž hrošy viartać admoviacca, to źviartajciesia sa skarhaj u adździeł handlu rajvykankama.
