Pamiž Minskam i Vilniaj płanujecca ruch chutkasnych elektraciahnikoŭ. Jak paviedamili u pres-słužbie Biełaruskaj čyhunki, pytańnie razhladałasia ŭ Minsku 15—16 krasavika na pasiadžeńni biełaruska-litoŭskaj rabočaj hrupy pa ŭzajemadziejańni ŭ tranzitna-transpartnaj śfiery.
Abmierkavanyja sumiesnyja dziejańni pa arhanizacyi chutkasnaha čyhunačnaha ruchu pamiž Minskam i Vilniaj i elektryfikacyi adrezka Maładziečna — Hudahaj — dziaržmiaža — Kiana — N. Vilnia ŭ miežach realizacyi 3-ha etapu płana dziejańniaŭ.
Baki adznačyli, što ŭ ruchu Biełaruś — Litva ŭ 2014 hodzie ŭsimi ciahnikami było pieravieziena 356,03 tys. pasažyraŭ. «Vyrašana praciahnuć pracu pa ŭdaskanaleńni pasažyrskich pieravozak u ruchu Biełaruś — Litva, uklučajučy zabieśpiačeńnie na pastajannaj asnovie kankurentazdolnych taryfnych umoŭ dla pryciahnieńnia pasažyraŭ, uzajemadziejańnie z pahraničnymi i mytnymi orhanami pa ŭdaskanaleńni technałohii praviadzieńnia kantrolnych apieracyj z pasažyrskimi ciahnikami i inšaje», — adznačyła pres-słužba.
Biełaruski bok taksama prainfarmavaŭ, što pavodle vynikaŭ pracy za 2014 hod abjom pieravozak hruzaŭ u čyhunačnym ruchu Biełaruś — Litva, uklučajučy party, pavialičyŭsia na 22% da ŭzroŭniu 2013 hoda. Dola Litoŭskich čyhunak u ahulnym abjomie mižnarodnych pieravozak Biełaruskaj čyhunki pavodle vynikaŭ minułaha hoda skłała: u vyvazie — 33,2%, va ŭvozie — 5,5%, u tranzicie — 15%.
«Udzielniki pasiadžeńnia paćvierdzili ŭzajemnuju zacikaŭlenaść u pavieličeńni i pryciahnieńni novych abjomaŭ pieravozak hruzaŭ pa Biełarusi i Litvie i damovilisia prykłaści nieabchodnyja namahańni dla pavyšeńnia ich kankurentazdolnaści», — adznačyli ŭ BČ.
Byli stanoŭča acenienyja vyniki pracy ciahnika kambinavanaha transpartu «Vikinh». Adznačany rost u 2014 hodzie abjomaŭ pieravozak na 2,7% da ŭzroŭniu 2013 hoda. «Baki damovilisia i ŭ dalejšym prykładać usie namahańni, skiravanyja na raźvićcio i pašyreńnie hieahrafii ciahnika «Vikinh», u pryvatnaści ŭ skandynaŭskija krainy, u krainy Zakaŭkaźzia i Siaredniaha Uschodu», — paviedamiła pres-słužba.