Da hetaha času dziejničali abmiežavańni na praviadzieńnie jurydyčnymi asobami — rezidentami avansavych płaciažoŭ pa imparcie za košt zamiežnaj valuty, nabytaj na ŭnutranym valutnym rynku, za košt kredytnych resursaŭ biełaruskich bankaŭ, a taksama za košt biełaruskich rubloŭ. Z času ŭvachodžańnia ŭ siłu pastanovy praŭleńnia Nacyjanalnaha banka ad 5 maja 2015 hoda № 277 nazvanyja abmiežavańni admienienyja. Dakumient nabyvaje moc z momantu aficyjnaha apublikavańnia.
Jak adznačaje pres-słužba Nacbanka, hetaje rašeńnie pryniata «ŭ metach nadańnia dadatkovaj dynamiki pracy pa harmanizacyi zakanadaŭstva, u tym liku valutnaha, u miežach Jeŭrazijskaha ekanamičnaha sajuza, adpaviadaje rekamiendacyjam misii Mižnarodnaha valutnaha fondu, pryśviečanaj ahladu valutnaj sistemy Respubliki Biełaruś u miežach vykanańnia Artykuła VIII Artykułaŭ pahadnieńnia MVF, i budzie sadziejničać pavyšeńniu dziełavoj aktyŭnaści i palapšeńniu ŭmoŭ viadzieńnia biźniesu ŭ Respublicy Biełaruś».
Abmiežavańni pa avansavych płaciažach byli ŭviedzienyja ŭ listapadzie 2008 hoda dla «niedapuščeńnia va ŭmovach suśvietnaha finansava-ekanamičnaha kryzisu narastańnia ŭ Biełarusi niehatyŭnych źjaŭ, źviazanych z adtokam kapitału z krainy». Avansavyja płaciažy byli dazvolenyja tolki ŭ miežach Mytnaha sajuza, u toj čas jak praviadzieńnie avansavych płaciažoŭ u inšyja krainy zabaraniałasia.
Biełaruskija biźnies-sajuzy vystupali za admienu zabarony na avansavańnie apłaty impartu kamiercyjnymi arhanizacyjami i indyvidualnymi pradprymalnikami.
Adnak, jak tłumačyŭ raniej Nacbank, «najaŭnaść valutnych abmiežavańniaŭ u Respublicy Biełaruś abumoŭlena najpierš značnym deficytam unutranych i źniešnich krynic prapanovy zamiežnaj valuty, niedastatkovaściu zołatavalutnych reziervaŭ».
