 Zdymak Biełaruś-fota |
Nahadajem, 8 lutaha prezident padpisaŭ ukaz ab źmianieńniach u praviły pryjomu ŭ vyšejšyja i siarednija śpiecyjalnyja navučalnyja ŭstanovy Biełarusi. Tekst dakumienta abnarodavany na Nacyjanalnym pravavym interniet‑partale.
Jak vynikaje z ukaza, da śpiecyjalnaściej, jakija traplajuć pad «asablivyja patrabavańni», adnosiacca: «dziaržaŭnaje kiravańnie», «dziaržaŭnaje kiravańnie i prava», «mižnarodnyja adnosiny», «mižnarodnaje prava», «pravaznaŭstva», «žurnalistyka», «mižnarodnaja žurnalistyka», «mytnaja sprava» i niekatoryja inšyja. Paradak prafiesijna‑psichałahičnaha sumoŭja abo testavańnia ŭstanaŭlivaje Ministerstva adukacyi.
Staršynia kamisii pa adukacyi, kultury, navucy i navukova‑techničnym prahresie pałaty pradstaŭnikoŭ nacyjanalnaha schodu Uładzimir Zdanovič stavicca da novaŭviadzieńniaŭ stanoŭča. Bolš taho, u intervju BiełaPAN jon vykazaŭ mierkavańnie ab «metazhodnaści pašyreńnia pieraliku takich śpiecyjalnaściej». Jak ličyć deputat, prafiesijna‑psichałahičnyja testy pavinny prachodzić usie abituryjenty, jakija ŭ budučyni buduć pracavać ź ludźmi.
U. Zdanovič nahadaŭ, što, zhodna z prajektam ukaza, budučyja žurnalisty i kiraŭniki pierad pastupleńniem pavinny byli brać rekamiendacyi ŭ orhanach miascovaj vykanaŭčaj ułady. Adnak u kančatkovy tekst dakumienta hetaje pałažeńnie nie ŭvajšło. «Takim rašeńniem my mahli sparadzić karupcyju ŭ hetaj śfiery. Akramia taho, rašeńnie ab prafpryhodnaści abituryjenta ŭsio‑taki pavinna prymacca śpiecyjalistami ŭ VNU», — skazaŭ kiraŭnik kamisii.
