 Uładzimier Zdanovič |
Deputaty zaviaršajuć pracu nad prajektam novaj redakcyi praviłaŭ biełaruskaj artahrafii i punktuacyi. Hety zakonaprajekt Pałata pradstaŭnikoŭ razhledzić u druhim čytańni na viesnavoj sesii. Pra heta paviedamiŭ u hutarcy z karespandentam BIEŁTA staršynia Stałaj kamisii pa adukacyi, kultury, navucy i navukova‑techničnym prahresie Pałaty pradstaŭnikoŭ Uładzimier Zdanovič.
Surazmoŭca nahadaŭ, što dziejnyja praviły biełaruskaj artahrafii j punktuacyi byli vydadzieny ŭ 1959 hodzie j z taho času nie źmianialisia. Novaja ich redakcyja zakanadaŭča zamacuje ŭsie źmieny, jakija adbylisia ŭ movie. Raspracavanyja novaŭviadzieńni nia nosiać kanceptualnaha charaktaru, a majuć na ŭviecie tolki peŭnuju karektyroŭku. Prapanujecca skasavać značnuju kolkaść vyklučeńniaŭ. Planujecca pašyryć pryncyp «aknania» ŭ zapazyčanych słovach, unieści źmieny ŭ napisańnie składanaskaročanych słoŭ («prafkam» zamiest «prafkom», «Centrvybarkam» zamiest «Centrvybarkom» dy inšyja), prybrać z dakumentu raździeły j pałažeńni, jakija nia tyčacca pravapisu, abnavić ilustracyi. Spraščajucca taksama praviły pieranosu, likvidujecca raznaboj u napisańni vialikich litar, pryvodziacca ŭ adpaviednaść z realijami času abrevijatury, pašyrajecca napisańnie «ŭ» nieskładovaha ŭ słovach inšamoŭnaha pachodžańnia.
«Padčas dapracoŭki dakumentu da druhoha čytańnia vyjavilisia niekatoryja «tonkija» miescy. Ciamier my «šlifujem» ich. Pryniata rašeńnie ŭ vypadku surjoznych razychodžańniaŭ u pracoŭnaj hrupie pa asobnych momantach viartacca da versii pravił 1959 hodu», — skazaŭ Uładzimier Zdanovič.
U pryvatnaści, uźnikli sprečki ŭ napisańni składanasastaŭnych słoŭ. Novyja praviły, naprykład, praduhledžvajuć napisańnie słova «piedinstytut» praz «y» — «piedynstytut», kab jano supadała z vymaŭleńniem. Adnak takija źmieny, moža być, i niemetazhodnyja, ličyć deputat.
Uładzimier Zdanovič paviedamiŭ, što analahičnyja sprečnyja pytańni profilnaja kamisija planuje abmierkavać na pasiedžańni ŭ Pałacie pradstaŭnikoŭ 12 lutaha.
