Hałavałomka (Inside Out)
Žanr: multfilm, drama, kamiedyja.
Režysior: Pit Dokter
U rolach (ahučka): Ljuis Błek, Mindzi Kiejlinh, Bił Chiejder, Emi Poler, Filis Śmit, Ryčard Kajnd, Kiejtlin Dzias
ZŠA, 94 chv.
Adznaka: 9.
Rajli — 11-hadovaja školnica ź Miniesoty. Jaje pavodziny vyznačajuć piać bazavych emocyj: Radaść, Smutak, Strach, Hnieŭ i Hreblivaść.
Emocyi žyvuć u śviadomaści dziaŭčynki i kožny dzień dapamahajuć joj spraŭlacca z prablemami, kirujučy ŭsimi jaje ŭčynkami. Raptam vyśviatlajecca, što Rajli razam z baćkami pierajazdžaje z rodnaha ŭtulnaha haradka ŭ šumny San-Francyska. Kožnaja z emocyj ličyć, što mienavita jana najlepš viedaje, što treba rabić u hetaj niaprostaj situacyi, i ŭ hałavie dziaŭčynki nastupaje błytanina. U sprobach vypravić situacyju Radaść, jakaja dasiul vierchavodziła siarod emocyj, razam sa Smutkam traplaje ŭ łabirynt doŭhačasovaj pamiaci. Ciapier jany źnikli sa śviadomaści Rajli, pakinuŭšy tam tolki Strach, Hnieŭ i Hreblivaść.
Novy multfilm studyi Pixar, viadomaj nadzvyčaj jakasnymi rabotami, pryŭzdymaje zaviesu tajamnic čałaviečaj psichiki. Stvaralniki ŭziali temu, tak ci inakš cikavuju usim, — jak emocyi kirujuć štodzionnym žyćciom. Režysior i scenaryst Pit Dokter («Karparacyja pačvaraŭ» (2001), «Uvierch» (2009) — premija «Oskar»-2010 za najlepšy animacyjny film) uziaŭ za siužetnuju asnovu fakty svajoj bijahrafii.
Dokteru ŭ svoj čas taksama daviałosia pierajechać ź Miniesoty ŭ San-Francyska, dzie raźmieščana štab-kvatera Pixar, a natchnieńnie jamu pryniesła dačka:
«Hety multfilm pačaŭsia z nazirańniaŭ za majoj dačkoj. Jana była vielmi žvavym i radasnym dziciom, ale kali joj spoŭniłasia 11 hadoŭ, jana stała bolš spakojnaj i strymanaj. I ja padumaŭ: «Heta dziŭna. Voś by daviedacca, što adbyvacca ŭ jejnaj hałavie». Paśla kansultacyi ź psichołahami vyśvietliłasia, što ŭsiaho možna naličyć da 27 emocyj. Ale asnoŭnych — šeść: radaść, smutak, strach, hnieŭ, hreblivaść i ździŭleńnie. Strach i ździŭleńnie vyrašyli abjadnać, i ŭ hałavie dziaŭčynki pasialilisia piać emocyj-piersanažaŭ: Hnieŭ adkazvaje za pačućcie spraviadlivaści, Strach — za biaśpieku, Hreblivaść — za hust i pačućcie miery, Radaść — za ciahu da žyćcia, Smutak — za spačuvańnie.
Składanuju strukturu psichiki stvaralniki raskryli pastupova i jaskrava. Tut jość roznakalarovyja śfiery pamiaci, dzie ŭtrymlivajucca ŭspaminy.
Jany składajucca ŭ łabirynty doŭhačasovaj pamiaci, a bazavyja ŭspaminy ŭtvarajuć Vyspy asoby — jarkija baki asoby dziaŭčynki: Siamja, Siabroŭstva, Hareźlivaść. Asobnuju prastoru zajmajuć Ujaŭleńnie i Padśviadomaść, a taksama pakoi Abstraktnaha myśleńnia.
Stužka budzie cikavaja i dzieciam, i ich baćkam. U siužecie znajšłosia miesca nie tolki zabavam, ale i sumnym, nieadnaznačnym momantam žyćcia dziciaci, jakoje pakrysie stanovicca padletkam.
