Śledčym kamitetam pryniata rašeńnie pra adnaŭleńnie kryminalnaj spravy ŭ dačynieńni da Viačasłava Davydoviča.
Pra heta paviedamiła ŭ svaim fejsbuku aficyjny pradstaŭnik SK Julija Hančarova.
Hetaje pracesualnaje rašeńnie pryniata paśla vyvučeńnia materyjałaŭ spravy viedamasnym pracesualnym kantrolem Śledčaha kamiteta z metaj pierapravierki i ŭstanaŭleńnia inšych faktaŭ supraćpraŭnaj dziejnaści, učynienych hetym hramadzianinam, u dačynieńni da niepaŭnaletnich, ich pałavoj niedatykalnaści, maralnaha i fizičnaha raźvićcia, adznačajecca ŭ paviedamleńni.
U chodzie rasśledavańnia budzie praviedzieny dadatkovy kompleks śledčych i inšych pracesualnych dziejańniaŭ, nakiravanych na abjektyŭnaje i ŭsiebakovaje vyvučeńnie ŭsich abstavinaŭ kryminalnaj spravy, — paviedamiła Ju. Hančarova.
***
U kancy maja paviedamlałasia, što kryminalnaja sprava pa artykule 168 KK Biełarusi (Pałavyja znosiny i inšyja dziejańni seksualnaha charaktaru z asobaj, jakaja nie dasiahnuła šasnaccacihadovaha ŭzrostu) u dačynieńni da byłoha kiraŭnika MDHA «U dapamohu dzieciam-sirotam» Viačasłava Davydoviča spyniena.
«Padazreńni, jakija ŭźnikli da asoby Davydoviča, nie paćvierdzilisia. Było pryniata rašeńnie ab spynieńni hetaj kryminalnaj spravy», — paviedamiŭ tady pieršy namieśnik staršyni Śledčaha kamiteta Alaksiej Vołkaŭ.
Kryminalnuju spravu pa artykule 168 na Davydoviča zaviało ŭpraŭleńnie Śledčaha kamiteta pa Minsku 25 červienia minułaha hoda.
Žurnalisckaje rasśledavańnie pa hetaj temie TUT.BY pravioŭ u 2014 hodzie. U artykule śćviardžałasia, što Davydovič źviazany ź fihurantami hučnaj «spravy pra piedafiłaŭ» achviarami jakich stali, pa zajavach apieratyŭnikaŭ, tysiačy dziaciej.
Ciapier Viačasłaŭ Davydovič adbyvaje pakarańnie za ekanamičnyja złačynstvy. U lutym 2014 hoda jaho prysudzili da 4 hadoŭ pazbaŭleńnia voli za niezakonnuju pradprymalnickuju dziejnaść, źviazanuju z atrymańniem dachodu ŭ asabliva bujnym pamiery.
