U biełaruskich rekach zafiksavali histaryčny minimum vady. Heta źviazvajuć ź minimalnymi apadkami ŭzimku, adsutnaściu pavodki i zasušlivym pačatkam leta. Pa niekatorych rekach užo nie mohuć płavać sudny.
Raka Prypiać naprykancy červienia
Pahroza sudachodstvu
«Na niekatorych rekach uzrovień vady dasiahnuŭ niebiaśpiečnaha značeńnia. Heta značyć, taki ŭzrovień vady niebiaśpiečny dla baržaŭ i jašče niekatorych sudoŭ. Takija miescy jość na Bierazinie, na Sožy i na Dniapry. Ale vada tam usio ž jość», — apisvajuć nastupstvy ŭ departamiencie pa hidramietearałohii Minpryrody.
Zamor ryby
Z-za nizkaha ŭzroŭniu vady moža paciarpieć ryba ŭ vadajomach. Bo ŭ vadzie nie chapaje kisłarodu. Heta moža spravakavać zamornyja źjavy.
«Niebiaśpieka zamornych źjavaŭ jość dla ryby, i jany ŭžo prysutničajuć, ale heta nie prymaje pakul masavaha charaktaru. Kab usio ŭznaviłasia, musiać prajści aktyŭnyja daždžy. Ale heta moža spravakavać pavodki, što taksama błaha», — analizujuć u departamiencie hidramietearałohii Minpryrody.
U ptušak mienš ptušaniat
U busłoŭ i inšych vidaŭ, jakija žyvuć kala vadajomaŭ, źnižajecca vyvadak. Na Prypiaci ŭ niekatorych miescach u kačak zusim nie było ptušaniat. Na Turaŭskim łuzie, važnym dla hniezdavańnia ptušak, sioleta vyvadak nulavy. Takija dadzienyja ahučvaje śpiecyjalist pa pryrodaachoŭnych pytańniach «Achovy ptušak Baćkaŭščyny» Siamion Levy:
«Dla mnohich rek na Paleśsi nazirałasia padobnaja karcina: kali niedasiažnaja raniej z-za vady terytoryja stała dasiažnaj dla drapiežnikaŭ. Heta zaŭvažna adbivajecca na vyvadku ptušak. Ale za adzin hod taki ŭpłyŭ moža mocna nie adbicca na papulacyi. Bo ŭ inšych miescach ptuški hniazdujucca i vyvodziać ptušaniat».
Pry hetym u busłoŭ sioleta naličvajuć pa 1-2 ptušaniatach (pry narmalnym vyvadku 2-5). Arnitołahi navat kažuć pra vypadki, kali busły vykidvajuć słabych ptušaniat z hniozdaŭ.
Kala 6% uradžajnych płoščaŭ sapsavanyja zasuchaj
U ministerstvie sielskaj haspadarki nie pradrakajuć vialikich strat z-za zasuchi. Ale pryznajuć, što Homielskaja vobłaść sioleta paciarpieła ad sonca, tamu ŭradžaj usio ž budzie krychu mienšy.
«Paciarpiełaja najbolš — Homielskaja vobłaść, my, viadoma, z-za jaje niedabiarem krychu. Ale ŭradžaju ŭsim chopić».
Pa papiarednich padlikach śpiecyjalistaŭ z navukova-praktyčnaha centru pa ziemlarobstvie Akademii navuk, sioleta źbiaruć kala 7 miljonaŭ ton zbožža, paviedamlaje BiełTA. Letaś sabrali bolš za 9 miljonaŭ ton.
