Jak prachodzić zbor podpisaŭ za pretendentaŭ na prezidenckuju pasadu? «Savieckaja Biełarusija» apublikavała padborku repartažaŭ z abłasnych centraŭ — Homiel, Brest, Mahiloŭ, Hrodna.
Jak karespandenty haziety Administracyi prezidenta apisvajuć zbor podpisaŭ za roznych kandydataŭ?
Voś pramova, u jakoj vybarščyca tłumačyć, čamu padtrymlivaje Łukašenku: «Ubačyła fota la pikieta, padyšła i padtrymała. Naš prezident — čałaviek kankretny, i ja taksama. Maje dzieci biaspłatna advučylisia ŭ vyšejšych navučalnych ustanovach, znajšli pracu. Ja pracuju. Niama deficytu. Usio spakojna. Dziaciej kolki stała naradžacca! Damy budujuć, škoły, darohi, stadyjony. Značyć, kiraŭnictva krainy narmalna robić svaju pracu. I heta mocny kozyr kandydata Łukašenki ŭ baraćbie za novy prezidencki termin».
Taksama ŭ Homieli niechta padpisaŭsia za Siarhieja Kalakina. Ź jakoj matyvacyjaj, pavodle «SB»? «Tvar pryjemny.
A kali ščyra, mnie chočacca, kab na vybarach byŭ vybar. Kožny hramadzianin Biełarusi moža vyłučać svaju kandydaturu. U nas šmat razumnych i talenavitych ludziej. Treba dać im mahčymaść pradstavić svaje palityčnyja prahramy i tady ŭžo vybirać», – adznačaje chatniaja haspadynia.
Pieranosimsia ŭ Brest. Tam «SB» znajšła čałavieka, jaki pakinuŭ podpis za Taćcianu Karatkievič: «Chočacca padtrymać žančynu. Simpatyčnaja».
A što ŭ treciaha kandydata ad apazicyi, Anatola Labiedźki?
«Niekatoryja ź minakoŭ zdaloku razhladajuć ahitacyjnyja płakaty i iduć dalej. Pažyły mužčyna, doŭha ŭčytvaŭsia ŭ bijahrafiju pretendenta, u niejki momant machnuŭ rukoj:
«A, usio jasna – jon ža deputatam Viarchoŭnaha Savieta užo byŭ».
Praŭda, što jasna, čałaviek nie patłumačyŭ. Da stolika ź pieradvybarnaj ahitacyjaj padychodziać dva niećviarozyja tavaryšy: «Vy tut podpisy źbirajecie? Davajcie, svaje pastavim. Ale vy nam 10 tysiač dajcie, vielmi nie chapaje», — raskazvaje mahiloŭski karespandent.
Jak vynikaje z materyjała «SB», z asnoŭnych kandydataŭ tolki Labiedźka nie moža sabrać hałasy ŭ svaju padtrymku. Heta nie pieršy vypadak, kali lidar AHP stanovicca mišeńniu ŭ materyjałach prapahandystaŭ. Telekanał ANT pakazaŭ vypusk prahramy «Kak jesť», pryśviečanaj Labiedźku.
