Vytvorčaść vajskovych sudoŭ na dynamičnaj pavietranaj padušcy — ekranapłanaŭ — było spynienaje z kancom historyi SSSR z-za niedachopu finansavańnia. Ciapier Rasija płanuje znoŭ vyrablać ekranapłany ŭ vyhladzie ŭdarnych bajavych kompleksaŭ z kryłatymi rakietami, paviedamiła RIA «Novosti».
Ekranapłan «Łuń» padčas vyprabavańniaŭ u 1980-ja, fota wikimedia.org
Ekranapłan — chutkasny (ad 400 km/h) aparat, jaki lacić na vyšyni da niekalkich mietraŭ ad pavierchni vady, ziamli, śniehu ci lodu. Adroźnivajecca vysokaj žyvučaściu, ekanamičnaściu ŭ palocie, hruzapadymalnaściu, małazaŭvažnaściu (z-za nizkaj vyšyni palotu). Taksama ekranapłanam nie patrebnyja aeradromy.
«Tema ekranapłanaŭ adnaŭlajecca va ŭdarnym vykanańni, jak «Łuń» — nośbit kryłatych rakiet. Budaŭnictva pavinna pačacca paśla 2020 hoda ŭ Nižnim Noŭharadzie», — skazaŭ pradstaŭnik kamandavańnia VMF RF.
«Łuń» — saviecki bajavy ekranapłan, pabudavany dla Kaśpijskaha mora ŭ 1986 hodzie i ŭžo śpisany i zakansiervavany. Mieŭ daŭžyniu kala 74 mietraŭ, vyšyniu 19,2 mietra, chutkaść 500 km/h. Uzbrajeńnie — 6 puskavych ustanovak supraćkarabielnych rakiet P-270 Maskit. Byŭ vyrableny tolki adzin taki latučy karabiel z 8 zapłanavanych.
Pry ŭsich plusach ekranapłany nie stali papularnym bajavym srodkam u śviecie — jany majuć nizkuju manieŭranaść, nie mohuć lacieć pa-nad składanym łandšaftam, patrabujuć vysokaj ciahaŭzbrojenaści dla startu i pry starcie spažyvajuć šmat paliva.
Raniej paviedamlałasia, što ŭ dziaržaŭnaj abaronnaj zamovie RF na 2011-2020 hady srodkaŭ na raspracoŭku i budaŭnictva ekranapłanaŭ nie praduhledžana.