Jak raspaviali «Ježiednievniku» krynicy, saŭładalnika chołdynhu «Trajpł» Uładzimira Japryncava zatrymlivali padčas śviatkavańnia dnia naradžeńnia, a pryčynaj aryštu mahło stać praduchileńnie sproby vyvadu kapitału z krainy.
Padrabiaznaściaŭ, u čym praviniŭsia adzin z samych upłyvovych biznesoŭcaŭ Biełarusi (a taksama zatrymany jaho syn Kaźbiek) pravaachoŭnyja orhany pakul nie apublikavali. Nie kamientujuć jany i infarmacyju, što havorka moža iści ab niekalkich dziasiatkach miljonaŭ dalaraŭ, jakija Uładzimir Japryncaŭ nibyta ci to źbiraŭsia, ci to pačaŭ pieravodzić u afšory. Pry hetym krynicy ej.by asabliva adznačajuć charaktar i momant zatrymańnia: Japryncava — starejšaha pryjechali brać 14 žniŭnia, kali jon adznačaŭ u adnym z restaranaŭ svajo 54-hodździe.
ŚMI stała viadoma pra zatrymańnie Uładzimira Japryncava (a potym jaho syna Kaźbieka) tolki praź niekalki dzion - u pačatku minułaha tydnia. Pa inšaj infarmacyi, Kaźbieka ŭziali jašče 8 žniŭnia. Pakul kampietentnymi orhanami nie paćvierdžany, ułasna, i sami fakty abmiežavańnia voli Japryncava.
Raniej u ŚMI paviedamlałasia, što pryčynaj aryštu viadomaha biznesmena i jaho syna mahła stać prablemnaja situacyja z ukrainskimi partniorami z kampanii Jaspen Capital Partner, jakim Kaźbiek Japryncaŭ i jaho partniory, atrymaŭšy hrošy, nie pastavili dyzpaliva. Ukraincy zaklučali kantrakt na takich umovach, tak jak ździełka harantavałasia chołdynham «Trajpł». Ale, jak ciapier kažuć ukraincy, «Trajpł» nie vykanaŭ abaviazacielstvaŭ, i ciapier jany rychtujuć pazoŭ u Łondanski sud.
