Avijakampanii «Mižnarodnyja avijalinii Ukrainy» i «Mator Sič» atrymali apaviaščeńnie Rasavijacyi ab zabaronie na paloty ŭ Rasiju z 25 kastryčnika.
«Apaviaščeńnie Rasavijacyi atrymanaje. Vymušanyja skasavać usie ŭłasnyja rejsy ŭ Maskvu, Sankt-Pieciarburh i Kalininhrad i viarnuć hrošy za nieakazanyja pasłuhi. Čystyja straty MAU składuć kala 10 młn dalaraŭ u hod», — paviedamiła pres-sakratar «Mižnarodnych avijalinij Ukrainy» Jaŭhienija Sackaja.
Pavodle jaje słoŭ, sankcyi taksama istotna źniziać abjom tranzitu ŭ aeraporcie «Baryspal».
«Mižnarodnyja Avijalinii Ukrainy» — najbujniejšaja avijakampanija krainy, vykonvaje ŭ tydzień 14 rejsaŭ pa maršrucie Kijeŭ-Maskva i try rejsy pa maršrucie Adesa-Maskva.
Atrymańnie telehramy Rasavijacyi paćvierdzili i ŭ avijakampanii «Mator Sič» — adnosna nievialikaj avijakampanii, samaloty jakoj lotajuć raz u dzień pa maršrucie Zaparožža-Maskva.
Paloty ŭ Rasiju vykonvaje taksama «Dniepravija» — pradstaŭniki hetaj avijakampanii pakul nie paviedamlali ab atrymańni apaviaščeńnia Rasavijacyi.
Jašče adna ŭkrainskaja avijakampanija — Yanair — tolki płanavała z 26 kastryčnika pačać paloty z Kijeva ŭ Maskvu, ale, jak paviedamiŭ pradstaŭnik pieravozčyka, paśla ŭviadzieńnia rasijskaj zabarony było vyrašana zamarozić adkryćcio rehularnaha avijarejsu ŭ Rasiju.
Zabarona ministerstva transpartu Rasii na paloty ŭkrainskich samalotaŭ nad rasiejskaj terytoryjaj była ŭviedzienaja ŭ jakaści miery ŭ adkaz na antyrasijskija sankcyi ŭkrainskaha ŭrada.
Ukaz prezidenta Piatra Parašenki ab uviadzieńni novaha typu sankcyj u dačynieńni da Rasii i inšych krain, «jakija majuć dačynieńnie da anieksii Kryma i ahresii ŭ Danbasie», byŭ apublikavany 17 vieraśnia. U śpis uvajšli 388 fizičnych i bolš za 100 jurydyčnych asob.
U čorny śpis kampanij, dla jakich Ukraina zakryła svaju pavietranuju prastoru, trapili najbujniejšyja rasijskija avijapieravozčyki — «Aerafłot», «Transaera», «Sibir», «Rasija», «Uralskija avijalinii», «Arenburhskija avijalinii» i inšyja. Nie trapiła pad sankcyi tolki kampanija «Jutejr».
