Kvartału Asmołaŭka ŭ Minsku moža być nadadzieny status kulturna-histaryčnaj spadčyny, paviedamiŭ žurnalistam 14 kastryčnika na prezientacyi karekciroŭki hienieralnaha płana Minska hałoŭny architektar UP «Minskhrada» Alaksandr Akienćjeŭ.
Hałoŭny architektar zaznačyŭ, što da 2030 hoda abjom «vybyćcia» žylla składzie 1 młn. kv. m, u tym liku 400 tys. kv. m — znos prysiadzibnaj zabudovy, 400 tys. kv. m — pierabudova pieršych pavierchaŭ žyłych budynkaŭ pad abjekty hramadskaha charčavańnia, bytavych pasłuh i h.d., 200 tys. kv. m — «vybyćcio dvuch- i trochpaviarchovaj zabudovy, jakaja maje vysoki ŭzrovień fizičnaha znosu». «Vyklučeńniem moža stać Asmołaŭka, vakoł jakoj šmat padziej. Kvartału moža być nadadzieny status kulturna-histaryčnaj spadčyny, i jon moža zachavacca», — skazaŭ Akienćjeŭ.
«Dla taho kab abaranić Asmołaŭku, pavinna być zakanadaŭčaja padstava, čym moža stać pryznańnie kaštoŭnaści kvartała. Heta robim nie my, nie horadabudaŭniki, a heta pytańnie Ministerstva kultury. My tolki rekamiendujem», — zaznačyŭ jon.
Jak paviedamlałasia raniej, bolš jak tysiača žycharoŭ Minska padpisała internet-pietycyju ŭ abaronu Asmałoŭski. Hety rajon histaryčnaha centra horada ŭjaŭlaje saboj dva nievialikija kvartały, abmiežavanyja vulicami Kamunistyčnaj, Kujbyšava, Kisialova i Maksima Bahdanoviča i razrezanych vulicaj Čyčeryna. Sprajektavaŭ rajon, jaki budavaŭsia z kanca 1940-ch da pačatku 1950-ch hadoŭ, minski architektar Asmałoŭski dla vysokapastaŭlenych čynoŭnikaŭ, supracoŭnikaŭ tahačasnaha štaba Biełaruskaj vajennaj akruhi.
«Rajon unikalny tym, — tłumačyć staršynia Biełaruskaha dobraachvotnaha tavarystva achovy pomnikaŭ historyi i kultury Anton Astapovič, — što tut u asnoŭnym uźviedzieny damy pa typavych prajektach — heta pieršyja typavyja damy ŭ Minsku, jakija źjavilisia razam z žyłoj zabudovaj rajonaŭ traktarnaha i aŭtamabilnaha zavodaŭ. Ale ŭ paraŭnańni z hetymi rajonami Asmołaŭka kampaktna zabudavanaja, i jaje možna nazvać pieršym spalnym rajonam Minska».
Na dumku ekśpierta, zabudova tut chacia i typavaja, ale maje vyraznyja mastackija rysy i pa svajoj płanirovačnaj struktury, architekturnaj marfałohii hety rajon źjaŭlajecca vielmi kaštoŭnym u horadabudaŭničym płanie. Niekalki razoŭ tavarystva achovy pomnikaŭ źviartałasia ŭ Minkultury z prapanovami ab nadańni rajonu statusu kulturna-histaryčnaj spadčyny, ale pa roznych farmalnych pryčynach ministerstva admaŭlała ŭ hetym.
***
Aznajomicca z ekspazicyjaj i inšymi materyjałami hienieralnaha płana Minska možna ŭ pieryjad z 12.10.2015 pa 05.11.2015 (z paniadziełka pa piatnicu — z 14.00 da 18.00, u subotu i niadzielu — z 10.00 pa 15.00) u budynku UP «Minskhrada» pa adrasie: h.Minsk, vuł. Kamsamolskaja, 8, 2 pavierch, kab. 204.
Zaŭvahi i prapanovy buduć prymacca ŭ pieryjad praviadzieńnia hramadskaha abmierkavańnia piśmova ŭ knizie zaŭvah i prapanoŭ z 14.00 da 18.00 pa vyšejpaznačanym adrasie, a taksama praz paštovuju suviazi i elektronnuju poštu (e-mail: [email protected]).
