Niahledziačy na niaŭdaču pieršaj sproby, Biełaruskaja fiederacyja futboła maje namier reanimavać ideju zamieny milicyi ściuardami ŭnutry stadyjonaŭ, zajaviŭ pieršy namieśnik staršyni BFF Siarhiej Safarjan na pres-kanfierencyi 28 kastryčnika.
Pavodle jaho słoŭ, jašče «da viadomych padziej va Ukrainie» byli prapanovy ad danieckaha «Šachciora», jaki mieŭ lepšuju słužbu ściuardaŭ u Jeŭropie. «Jany prapanoŭvali pravieści navučańnie našych ściuardaŭ, kali my aktyŭna hetym zajmalisia. Ale, na žal, my nie znajšli padtrymki z boku MUS pa aktyŭnym ukaranieńni instytuta ściuardaŭ. Tamu ja nie mahu skazać, jak heta budzie raźvivacca», — skazaŭ Safarjan.
Razam z tym u fiederacyi «jość žadańnie ŭsio-taki raździalić śfieru adkaznaści ŭ tym, što tyčycca praviadzieńnia futbolnych matčaŭ, dzie jość sens vykarystoŭvać surjoznyja słužby pravaparadku, a dzie pastaracca ad ich adyści i, moža, niejak źmiakčyć situacyju».
«I ŭ milicyi budzie mienš pracy, a z druhoha boku, pajavicca adkaznaść u arhanizavanych hrup balelščykaŭ: pa-inšamu stavicca da pavodzin tych, chto pobač ź imi znachodzicca na trybunach. My miarkujem, što mienš budzie pravakacyj i z taho, i z druhoha boku», — zajaviŭ pradstaŭnik BFF.
Jon prapanoŭvaje vykarystoŭvać ściuardaŭ unutry stadyjona, a orhany ŭnutranych spraŭ — na źniešnim pierymietry dla ažyćciaŭleńnia nadhladu.
Safarjan vykazaŭ mierkavańnie, što heta pytańnie budzie abmiarkoŭvacca na pieramovach kiraŭnika fiederacyi Siarhieja Rumasa ź ministram unutranych spraŭ Iharam Šunievičam. Jak užo paviedamlałasia, Rumas źbirajecca sustrecca z Šunievičam paśla vychadu z vodpusku, kab abmierkavać prablemy ŭzajemaadnosin siłavikoŭ i fanataŭ, jakija čarhovy raz abvastrylisia 12 kastryčnika padčas adboračnaha matču čempijanatu Jeŭropy-2016 Biełaruś—Makiedonija. Tady za našeńnie šalikaŭ z histaryčnym hierbam «Pahonia» byli zatrymanyja try balelščyki. Astatnija ŭ znak pratestu pakinuli trybunu. Siłaviki, u svaju čarhu, śćviardžali, što fanaty byli ŭ niećviarozym stanie i nie padparadkavalisia ich zakonnym patrabavańniam.
