Śledčy kamitet Biełarusi dazvoliŭ eks-kandydatu ŭ prezidenty Alesiu Michaleviču z 30 kastryčnika pa 5 listapada vyjechać u Čechiju.
fota Siarhieja Hudzilina
Jak paviedamiŭ Michalevič, u Čechii jon maje namier admovicca ad palityčnaha prytułku, paśla čaho vierniecca ŭ Biełaruś, dzie ŭ dačynieńni da jaho ŭsio jašče viadziecca kryminalnaja sprava ab masavych biesparadkach 19 śniežnia 2010 hoda.
Michalevič viarnuŭsia ŭ Biełaruś 8 vieraśnia praz čatyry z pałovaj hady emihracyi ŭ Čechii, dzie atrymaŭ palityčnaje prystanišča. Jon byŭ zatrymany biełaruskimi pamiežnikami pry ŭjeździe ź Litvy padčas pašpartnaha kantrolu jak asoba, jakaja zaraz znachodzicca ŭ nacyjanalnym vyšuku. Michaleviča pieradali milicyi, ale praź niekalki hadzin adpuścili na volu pad padpisku ab niavyjeździe.
Viarnuŭšysia na radzimu, Michalevič adrazu ž padaŭ va Upraŭleńnie Śledčaha kamiteta pa horadzie Minsku chadajnictva ab spynieńni ŭ dačynieńni da jaho kryminalnaj spravy, jakaja ŭ dačynieńni da inšych fihurantaŭ užo zakrytaja. Adnak u zadavalnieńni chadajnictva jamu admoŭlena.
Takim čynam, Aleś Michalevič praciahvaje zastavacca ŭ statusie abvinavačvanaha pa kryminalnaj spravie ab masavych biesparadkach u Minsku 19 śniežnia 2010 hoda.
Varta zaznačyć, što ŭ Kanviencyi AAN ab statusie biežanca ŭtrymlivajucca šerah umoŭ, pry jakich čałaviek pazbaŭlajecca statusu biežanca. Adna ź ich — dobraachvotnaje viartańnie ŭ krainu, jakuju čałaviek pakinuŭ z-za apasieńniaŭ pieraśledu. Takaja ž norma ŭtrymlivajecca i ŭ zakonie Čechii ab biežancach.
