Matryca mier pa kredytnaj prahramie, u miežach jakoj Biełarusi moža być vydadzieny novy kredyt Jeŭrazijskaha fondu stabilizacyi i raźvićcia, amal uzhodnienaja. Pra heta paviedamiŭ 29 kastryčnika na pres-bryfinhu ŭ Maskvie staršynia praŭleńnia Jeŭrazijskaha banka raźvićcia (JEABR) Dźmitryj Pankin.
«Havorka idzie ab vydzialeńni Biełarusi novaha kredytu sa srodkaŭ Jeŭrazijskaha fondu stabilizacyi i raźvićcia. My amal poŭnaściu ŭzhadnili matrycu mier. Tam znajšli adlustravańnie pytańni skaračeńnia subsidyj pa kamunalnych taryfach, pa abjomie hrašovaj masy, pa kredytnym stymulavańni ekanomiki», — skazaŭ jon.
Pankin zaznačyŭ, što pytańnie ab vydzialeńni Biełarusi novaha kredytu budzie razhladacca na bližejšym pasiadžeńni Savieta Jeŭrazijskaha fondu stabilizacyi i raźvićcia. «Saviet prymaje palityčnaje rašeńnie ab vydzialeńni kredytu», — rastłumačyŭ kiraŭnik praŭleńnia JEABR.
Z zajaŭkaj na atrymańnie čarhovaha kredytu Biełaruś źviarnułasia ŭ Jeŭrazijski fond stabilizacyi i raźvićcia ŭ sakaviku hetaha hoda. Pieršapačatkova biełaruski bok zapytvaŭ u fondu kredyt na 3 młrd dołaraŭ, adnak u žniŭni kiraŭnictva Nacbanka Biełarusi zajaviła, što havorka idzie ab kredycie, suma jakoha znachodzicca ŭ dyjapazonie ad 2 da 3 młrd dołaraŭ.
Pavodle infarmacyi BiełaPAN, pasiadžeńnie fondu Savieta Jeŭrazijskaha fondu stabilizacyi i raźvićcia, na jakim budzie razhledžana pytańnie ab vydzialeńni novaha kredytu Biełarusi, pavinna prajści da kanca 2015 hoda.
Varta zaznačyć, što razam z kredytam Jeŭrazijskaha fondu stabilizacyi i raźvićcia biełaruski bok žadaje atrymać novy kredyt Mižnarodnaha valutnaha fondu ŭ pamiery 3 młrd dołaraŭ. U listapadzie Minsk płanuje naviedać misija MVF, jakaja budzie abmiarkoŭvać ź biełaruskimi ŭładami ŭmovy novaj kredytnaj prahramy.
U 2009—2010 i ŭ 2011—2013 hadach Biełaruś atrymała kredyty i ad MVF, i ad jeŭrazijskaha fondu, jaki tady nazyvaŭsia Antykryzisnym fondam JeŭrAzES.
