Prezident Rasii Uładzimir Pucin padpisaŭ ukaz ab stvareńni dziciača-junackaj arhanizacyi pad nazvaj Rasijski ruch školnikaŭ.
Pucin i dzieci. Fota zavtra.ru
U tekście dakumienta, apublikavanym na sajcie Kramla, adznačajecca, što arhanizacyja stvarajecca dla bolš efiektyŭnaha vychavańnia padrastajučaha pakaleńnia i sadziejničańnia farmiravańniu asoby na asnovie ułaścivaj rasijskamu hramadstvu sistemy kaštoŭnaściaŭ.
U jakaści zasnavalnika arhanizacyi vystupić Rasmoładź. Vyšejšym kirujučym orhanam budzie źjezd arhanizacyi, jaki budzie sklikacca pa rašeńni jaje ž kaardynacyjnaj rady. Na źjeździe raz na try hady buduć abiracca staršynia i dva sustaršyni arhanizacyi.
Niekatoryja rasiejskija ŚMI rascanili stvareńnie novaj moładzievaj arhanizacyi jak adnaŭleńnie pijanierskaj arhanizacyi časoŭ Savieckaha Sajuza, uhledzieŭšy padabienstva ŭ ich metach. Pry hetym metaj savieckich pijanieraŭ było vychavańnie zmaharoŭ za spravu KPSS.
Stvaryć ahulnarasijskuju dziciača-junackuju arhanizacyju Pucina ŭ pačatku kastryčnika paprasili lidary ŭsich čatyroch dumskich frakcyj. Na ich dumku, Rasii nieabchodnaja struktura, jakaja budzie abjadnoŭvać moładź.
Adnačasova partyja «Radzima» zajaviła, što padrychtavała ŭłasnuju kancepcyju takoj arhanizacyi. Prapanavany partyjaj prajekt mierkavaŭ dzialeńnie členaŭ junackaj arhanizacyi na čatyry ŭzrostavyja katehoryi.
Dziaciej małodšaha ŭzrostu prapanoŭvałasia zaličać u «dabraty» (ras. «dobriata»), dziaciej krychu starejšych — u «družyńniki», staršakłaśnikaŭ — u «dobraachvotniki», a junakoŭ starejšych za 21 hod — u «dziaržaŭnikaŭ». Adnak nieviadoma, ci pakładzienaja mienavita hetaja kancepcyja ŭ asnovu ŭkaza prezidenta Pucina.
Raniej rasiejskija ŭłady ŭžo rabili kroki, jakija krytyki rasceńvali jak viartańnie da savieckich realij. U pryvatnaści, była adrodžanaja sdača normaŭ HPA, skasavanaja paśla raspadu Savieckaha Sajuza.
