Eyal Warshavsky / AP
U Francyi va ŭzroście 97 hadoŭ pamior Markus Klinhbierh — samy viadomy špijon, kali-niebudź vykryty śpiecsłužbami Izraila. Pra heta paviedamlaje The Times of Israel.
Jaho aryštavali ŭ 1983 hodzie, abvinavaciŭšy ŭ rabocie na KDB ciaham papiarednich 30 hadoŭ. Na toj momant Klinhbierh byŭ namieśnikam dyrektara zvyšsakretnaha instytuta bijałahičnych daśledavańniaŭ u Nies-Cyjonie, a taksama prafiesaram epidemijałohii ŭ Tel-Aviŭskim univiersitecie. U pryvatnaści, jon pieradavaŭ Savieckamu Sajuzu infarmacyju pra toje, jakuju dziejnaść viadzie Izrail u halinie chimičnaj i bijałahičnaj zbroi.
Pa słovach samoha vučonaha, jon pracavaŭ na SSSR pa ideałahičnych mierkavańniach, a taksama ŭ padziaku za pieramohu nad nacystami.
Klinhbierha prysudzili da 20 hadoŭ turmy, pry hetym, jak udakładniaje vydańnie, pałovu terminu jon pravioŭ u adzinočnaj kamiery. Paśla vyzvaleńnia ŭ 2003 hodzie jamu dazvolili źjechać da dački i ŭnuka ŭ Paryž.
Aŭraam Markus Klinhbierh naradziŭsia ŭ 1918 h. u Varšavie, vučyŭsia ŭ Varšaŭskim univiersitecie. U pačatku Druhoj suśvietnaj pierabraŭsia ŭ SSSR, u Minsk, i skončyŭ Minski miedinstytut.
22 červienia 1941 hoda ŭstupiŭ u Čyrvonuju Armiju, udzielničaŭ u Vialikaj Ajčynnaj vajnie, atrymaŭ zvańnie kapitana miedycynskaj słužby, byŭ paranieny. U 1943 h. skončyŭ u Maskvie aśpiranturu pa infiekcyjnych zachvorvańniach i paśla vyzvaleńnia častki Biełarusi ŭ 1943 h. byŭ pryznačany hałoŭnym infiekcyjanistam BSSR.
Pa zakančeńni vajny Klinhbierh viarnuŭsia ŭ Polšču, dzie daviedaŭsia, što ŭsia jaho siamja i rodnyja zahinuli ŭ Treblincy. Niekatory čas pracavaŭ u ministerstvie achovy zdaroŭja Polščy ŭ jakaści namieśnika hałoŭnaha infiekcyjanista. U 1948 Klinhbierh z žonkaj Vandaj pryjechaŭ u Izrail.
