Śviedki Ijehovy ŭ Biełarusi ličać pretenzii, što ŭźnikli z boku ŭpaŭnavažanaha pa spravach relihij i nacyjanalnaściaŭ Leanida Hulaki, nieparazumieńniem, zajaviŭ staršynia hetaha relihijnaha abjadnańnia Pavieł Jadłoŭski.
Na kalehii aparatu ŭpaŭnavažanaha pa spravach relihij i nacyjanalnaściaŭ, jakaja adbyłasia 2 lutaha ŭ Minsku, Hulaka zajaviŭ ab šerahu parušeńniaŭ zakanadaŭstva, dapuščanych śviedkami Ijehovy ŭ 2015 hodzie. U pryvatnaści, havorka išła ab raspaŭsiudžvańni relihijnaj litaratury biez naležnaha ŭzhadnieńnia ź miascovymi ŭładami, a taksama ab peŭnaj niezadavolenaści niekatorych hramadzian «nastojlivymi i niepravamiernymi dziejańniami» členaŭ supołak abjadnańnia. Hulaka nie vyklučyŭ, što «sumiesna z vykankamami buduć pryniaty kankretnyja zachady pa źniaćci z rehistracyi niekatorych supołak śviedak Ijehovy».
«My nie zusim razumiejem, pra jakija parušeńni idzie havorka, my budziem rady, kali aparat upaŭnavažanaha abo abłvykankamy padaduć nam infarmacyju ab kankretnych prablemach abo parušeńniach, — skazaŭ Jadłoŭski. — Što tyčycca pytańniaŭ raspaŭsiudžvańnia materyjałaŭ, to ŭsia litaratura prachodzić relihijaznaŭčuju ekśpiertyzu. My jak abjadnańnie dajem jaje [na analiz]. U cełym jana karysnaja dla našaj dziaržavy i hramadstva, tam šmat karysnych artykułaŭ».
Biełaruskaje zakanadaŭstva, pavodle jaho słoŭ, «nie zabaraniaje hramadzianam raspaŭsiudžvać asabista svaju litaraturu ŭ lubym miescy». Ź inšaha boku, jak jurydyčnaja asoba relihijnaje abjadnańnie raspaŭsiudžvaje tolki tuju litaraturu, jakuju ŭ jaho zakazvajuć sami členy supołak.
«U cełym śviedki Ijehovy — heta zakonapasłuchmianyja hramadzianie. Mnie zdajecca, pa bolšaj častcy adbyłosia niejkaje nieparazumieńnie, i kali ŭ pradstaŭnikoŭ ułady jość da nas pytańni, to my hatovyja da adkrytaha dyjałohu», — zajaviŭ Jadłoŭski.
U kancy hetaha tydnia kiraŭnik śviedak Ijehovy ŭ Biełarusi maje namier sustrecca z pradstaŭnikami aparatu ŭpaŭnavažanaha pa spravach relihij i nacyjanalnaściaŭ, kab abmierkavać ŭźnikłyja pytańni.
Abjadnańnie śviedak Ijehovy było zarehistravana ŭ Biełarusi ŭ 1994 hodzie. Na červień 2012 hoda ŭ krainie naličvałasia zvyš 5 tys. aktyŭnych viernikaŭ u 67 supołkach.
