Hałoŭnaja vajennaja prakuratura Hienieralnaj prakuratury Ukrainy (HPU) paviedamiła pra padazreńni eks-ministru abarony Ukrainy za nienaležnaje vykanańnie słužbovych abaviazkaŭ. Michaiła Ježala padazrajuć u sprobie niezakonna pradać Rasijskaj Fiederacyi bambaviki.
zn.ua
Jak paviedamlaje pres-słužba HPU, dapuščanaja chałatnaść mieła miesca pry ŭzhadnieńni ŭ 2011 hodzie pieraliku vajennaj majomaści Uzbrojenych sił Ukrainy, jakaja padlahaje adčužeńniu.
«U dalejšym heta rašeńnie dazvoliła Ministerstvu abarony Ukrainy ažyćciavić niepravamiernaje adčužeńnie dvuch ciažkich stratehičnych bambavikoŭ TU-95MS subjektu pradprymalnictva, jakoje paciahnuła ciažkija nastupstvy ŭ vyhladzie materyjalnaj škody dziaržavie ŭ asabliva bujnym pamiery na sumu bolš za 24 miljony hryŭniaŭ», — paviedamlaje HPU.
Padčas dasudovaha rasśledavańnia vyjaŭlenaje miescaznachodžańnie bambavikoŭ i ich kamplektujučych, na ich nakładzieny aryšt.
«Była praduchilenaja dalejšaja realizacyja samalotaŭ i ich kamplektujučych u Rasijskuju Fiederacyju», — adznačyli ŭ Hienprakuratury.
Michaił Ježal byŭ pryznačany pasłom u Biełarusi 3 krasavika 2013 hoda ŭkazam Viktara Janukoviča, jaki tady byŭ prezidentam Ukrainy. Da hetaha zajmaŭ pasadu daradcy prezidenta Ukrainy, u 2010-2012 hadach byŭ ministram abarony, jašče raniej — hałoŭnakamandujučym Vajenna-marskimi siłami Uzbrojenych sił Ukrainy.
U žniŭni 2014 hoda Hienieralnaja prakuratura Ukrainy raspačała suprać Michaiła Ježala bolš za 50 kryminalnych spraŭ za aktyŭny ŭdzieł u źniščeńni tyłavoha zabieśpiačeńnia ŭkrainskaj armii.