«Kamientavać špijonskija ramany — sprava niaŭdziačnaja: aŭtar pakryŭdzicca, amatary žanru buduć rasčaravanyja», — zajaviŭ pres-sakratar MZS Biełarusi Dźmitryj Mirončyk, kamientujučy na bryfinhu 31 sakavika apublikavany napiaredadni dakład litoŭskich orhanaŭ dziaržbiaśpieki.
U dakładzie śćviardžajecca, što suprać Litvy pracujuć try biełaruskija śpiecsłužby — Kamitet dziaržaŭnaj biaśpieki (KDB), Hałoŭnaje raźviedvalnaje ŭpraŭleńnie (HRU) hienštaba Ministerstva abarony i raźviedvalnyja padraździaleńni Dziaržpahrankamiteta.
Jak zajaviŭ Mirončyk, jon moža aficyjna paćvierdzić, što ŭ štacie pasolstva Biełarusi ŭ Litvie jość daradca — aficyjny pradstaŭnik KDB, jaki «całkam aficyjna, piśmova, pradstaŭleny ŭ hetaj jakaści kiraŭnictvu orhanaŭ dziaržbiaśpieki Litoŭskaj Respubliki».
«Taksama ŭ štacie pasolstva jość vajenny ataše i pamočnik vajennaha ataše, jakija aficyjna pradstaŭlajuć u Litvie Uzbrojenyja siły Respubliki Biełaruś. Ci jość anałahičnyja supracoŭniki ŭ litoŭskim pasolstvie ŭ Minsku — pytańnie rytaryčnaje, jaho lepš zadavać litoŭskamu boku. Roźnica tolki ŭ tym, što my ŭ adroźnieńnie ad našych litoŭskich partnioraŭ nie zachaplajemsia žanram špijonskaha ramana», — padkreśliŭ pres-sakratar MZS.
Miž tym u dakładzie departamienta dziaržbiaśpieki i druhoha departamienta apieratyŭnych słužbaŭ Minabarony Litvy havorycca, što asnoŭnymi zadačami biełaruskich śpiecsłužbaŭ źjaŭlajucca padtrymańnie stabilnaści biełaruskaj ułady i prasoŭvańnie ekanamičnych i palityčnych intaresaŭ Biełarusi ŭ Litvie i Jeŭrasajuzie.
Adznačajecca taksama, što padčas vybaraŭ prezidenta Biełarusi ŭ 2015 hodzie biełaruskija śpiecsłužby źbirali infarmacyju ab biełaruskich apazicyjnych arhanizacyjach, jakija pracujuć u Litvie, sprabavali ŭkaranić u ich svaich ahientaŭ i vierbavali členaŭ biełaruskaj abščyny ŭ Litvie dla taho, kab padtrymlivać raskoł u apazicyi i nie dapuścić jaje abjadnańnia.
U dakładzie taksama śćviardžajecca, što pałova dypłamataŭ biełaruskaha pasolstva ŭ Litvie źjaŭlajucca supracoŭnikami KDB ci HRU.
