Ministerstva abarony Rasii rezka raskrytykavała dakład ab mahčymaj hibieli mirnych žycharoŭ u Siryi ŭ vyniku rasiejskich avijaŭdaraŭ.
ria.ru
Viedamstva adreahavała na dakład prajekta AirWars. U im havaryłasia, što ŭ vyniku dziejańniaŭ rasijskich vojskaŭ u Siryi za try miesiacy zahinuli ad 1000 da 1500 mirnych žycharoŭ. Maskva nieadnarazova adprečvała lubyja abvinavačvańni ŭ datyčnaści da hibieli cyvilnaha nasielnictva Siryi.
Pa słovach aficyjnaha pradstaŭnika minabarony Ihara Kanašenkava, dakumient zasnavany na «zdahadkach brytanskich «pravaabarončych» žyvapyrak».
Hienierał-major miarkuje, što ŭ «admatrošanych užo kantor typu «Siryjskaja absiervatoryja pravoŭ čałavieka» (Siryjski centr manitorynhu za pravami čałavieka) źjaviłasia novaja šylda».
«A samo abnaŭleńnie «asartymientu» brytanskich «analitykaŭ» — prymityŭny chod na ŭzroŭni studentaŭ-pieršahodak, jakija asvojvajuć asnovy markietynhu ŭ pravincyjnym kaledžy», — skazaŭ Kanašenkaŭ.
Aficyjny pradstaŭnik minabarony taksama vykazaŭ ździŭleńnie tym, što «antyrasiejskija «ekśpierty», «analityki», «aktyvisty», «pravaabaroncy» i prosta nienaviśniki Rasii «jak atrutnyja hryby, tak dobra rastuć i razmnažajucca mienavita na ziemlach brytanskaha Karaleŭstva».
Jon vykazaŭ zdahadku, što heta źviazana z «intelektualnym biaspłodździem čapurystych «siabroŭ» u śpiecyjalnych słužbach Tumannaha Albijona».
AirWars pazicyjanuje siabie jak niekamiercyjny prajekt. Jaho metaj nazyvajecca adsočvańnie bajavych dziejańniaŭ u Siryi i Iraku. Pa słovach jaho stvaralnikaŭ, prajekt finansujecca niekalkimi fondami. Jon realizujecca siłami niekalkich žurnalistaŭ i hramadzianskich aktyvistaŭ z Zachodniaj Jeŭropy i ź Blizkaha Ŭschodu.
U hibieli mirnych žycharoŭ u vyniku vajennaj kampanii Maskvu abvinavačvali taksama AAN, ułady zachodniejeŭrapiejskich krain i ZŠA, a taksama inšyja pravaabarončyja arhanizacyi, siarod jakich «Daktary bieź miežaŭ» i Amnesty International.
