U Biełarusi moža być zabaronienaja adkrytaja vykładka elektronnych cyharet i ich prodaž asobam da 18 hadoŭ, paviedamiła 12 krasavika na pres-kanfierencyi ŭ Minsku namieśnik hałoŭnaha ŭrača DU «Respublikanski centr hihijeny, epidemijałohii i hramadskaha zdaroŭja» Ludmiła Narojčyk.
Pavodle jaje słoŭ, asnoŭnym dakumientam, jaki rehuluje abarot i vykarystańnie elektronnych sistem kureńnia, stanie abnoŭleny antytytuniovy dekret prezidenta № 28 paśla jaho ŭchvały va ŭradzie.
«Rynak elektronnych cyharet zaraz zusim nie rehulujecca, tamu asnoŭny pryncyp pałažeńniaŭ dekreta budzie ŭ tym, kab pryraŭnavać elektronnyja cyharety da zvyčajnych tytuniovych vyrabaŭ, z usimi nastupnymi abmiežavańniami, — skazała jana. — Tak, budzie zabaronieny prodaž elektronnych cyharet asobam, jakija nie dasiahnuli 18-hadovaha ŭzrostu, a taksama adkrytaja vykładka ŭ miescach prodažu, pašyrycca pieralik miescaŭ, dzie ich prodaž i ŭžyvańnie buduć zabaronienyja».
Namieśnik hałoŭnaha ŭrača adznačyła, što ŭsio bolš łakalnych daśledavańniaŭ roznych krain, u jakija ŭkładvajucca surjoznyja hrošy, dakazvajuć škodu elektronnych cyharet, i ni adno — karyść.
«Sprava ŭ tym, što pry kureńni elektronnaj cyharety prapilenhlikol i nikacin z paraj adrazu traplajuć u alvieoły, heta značyć u lohkija, — rastłumačyła miedyk. — U niekatorych ludziej užo naziralisia vypadki atručeńnia nikacinam mienavita ŭ vypadkach vykarystańnia elektronnych sistem kureńnia, bo čałaviek nie dazuje kureńnie. Jon pastajanna kuryć i ŭ vyniku atrymlivaje nadzvyčajnuju dozu nikacinu. Asabliva heta nazirałasia ŭ padletkaŭ».
Akramia taho, padkreśliła śpiecyjalist, zusim nie kantralujecca sistema vytvorčaści — što dabaŭlajecca ŭ hetyja kartrydžy, što za aramatyzatary i hetak dalej. Tamu, ličyć Narojčyk, «lepš svoječasova pryniać miery, pakul nie stała pozna».
Zhodna sa źviestkami letašniaha respublikanskaha sacyjalnaha daśledavańnia, 67% kurcoŭ chočuć kinuć hetuju zvyčku, daviedaŭšysia, jakuju škodu jana pryčyniaje zdaroŭju. Za apošnija 12 hadoŭ raspaŭsiudžanaść kureńnia ŭ Biełarusi źniziłasia bolš jak na 11%. Za apošnija dva hady pracent raspaŭsiudžanaści kureńnia siarod nasielnictva va ŭzroście ad 16 hadoŭ i starejšaha ŭ Biełarusi źniziŭsia da 27,8% suprać 30,5% u 2012 hodzie.
«Źnižeńnie na adzin-dva pracenty ŭ hod — heta dla našaj krainy ŭžo pośpiech», — zajaviła miedyk. Pavodle jaje słoŭ, tendencyja siarod mužčyn bolš pazityŭnaja — z 2006 hoda kolkaść kurcoŭ źmienšyłasia na 8%. Razam z tym pracent žančyn, jakija kurać, nie źmianšajecca i stabilna zachoŭvajecca na ŭzroŭni 17%.
