radiopolsha.pl
Palicyja acaniła kolkaść udzielnikaŭ akcyi ŭ 45 tysiač čałaviek, a jaje arhanizatary śćviardžajuć, što na vulicy vyjšła kala čverci miljona hramadzian. Mitynhoŭcy pratestavali suprać palityki kirujučaj kansiervatyŭnaj partyi «Prava i spraviadlivaść».
«Siońnia my sabralisia razam dla taho, kab nie dapuścić kašmaru aŭtarytarnaj ułady», — zajaviŭ kiraŭnik partyi «Hramadzianskaja płatforma» Hžehaž Schietyna pierad pačatkam maršu. «My nie dapuścim parušeńnia demakratyi, viaršenstva prava i Kanstytucyi. My nie damo na heta svajoj zhody», — padkreśliŭ jon.
Na dumku Hžehaža Schietyny, antyjeŭrapiejskaja dziejnaść — «heta pramaja daroha na Uschod». «My nie zhodnyja na žaleznuju zasłonu, nie zhodnyja z adprečańniem Jeŭropy. My jość i my budziem u Jeŭropie», - zajaviŭ jon.
U maršy braŭ udzieł były prezident Polščy Branisłaŭ Kamaroŭski. «My ŭsie vydatna razumiejem, što pryjšli siudy nie tamu, što nam dobra razam, a tamu — što ŭ Polščy drenna. My tut, kab zmahacca za polskuju svabodu, polskuju demakratyju i polskaje prava narmalna funkcyjanavać u Jeŭrapiejskim sajuzie», - zajaviŭ jon.
***
Raniej partyja «Prava i spraviadlivaść» padvierhnułasia krytycy z boku Jeŭrakamisii. Pretenzii vyklikali ŭniesienyja joju źmieny ŭ zakony, jakija rehulujuć dziejnaść śpiecsłužbaŭ i miedyjarynak, a taksama praviedzienaja sudovaja reforma.
Najbolš mocny rezanans vyklikała mienavita sudovaja reforma, istotna źmianiła pryncyp pracy Kanstytucyjnaha suda krainy. Polskija ŭłady zaćvierdzili jaje ŭ śniežni minułaha hoda.
Zaraz dla vyniasieńnia rašeńnia za jaho pavinny prahałasavać dźvie traciny z usich sudździaŭ Kanstytucyjnaha suda. Parłamient atrymaŭ prava adchilać sudździaŭ, a sud adnačasova pazbaviŭsia prava pryznavać prezidenta krainy niazdolnym vykonvać svaje abaviazki.
U siaredzinie sakavika Rada Jeŭropy zajaviła, što reforma istotna abciažaryć praces razhladu skarhaŭ kanstytucyjnym sudom i pryviadzie da pavieličeńnia terminu vyniasieńnia rašeńniaŭ pa ich.
Jeŭrakamisija vyrašyła pravieryć, ci nie parušaje reforma pryncyp viaršenstva zakona.
