Dyrektar Biuro pa demakratyčnych instytutach i pravach čałavieka (BDIPČ) ABSIE Michael Hieorh Link zaklikaŭ Biełaruś nieadkładna ŭvieści maratoryj na pryviadzieńnie ŭ vykanańnie śmiarotnaj kary ŭ jakaści pieršaha kroku na šlachu da jaje poŭnaj admieny.
Zajava, apublikavanaja na sajcie arhanizacyi, stała reakcyjaj na vykanańnie ŭ Biełarusi śmiarotnaha prysudu ŭ dačynieńni da Siarhieja Ivanova (za žorstkaje zabojstva čałavieka), a taksama na rašeńnie Viarchoŭnaha suda pakinuć u sile śmiarotny prysud Siarhieju Chmialeŭskamu (za zabojstva troch čałaviek). Pra abodva fakty stała viadoma 6 maja.
«Całkam vidavočna, što šlacham admieny śmiarotnaha pakarańnia bolšaść dziaržaŭ — udzielnic ABSIE pryznali pa svajoj sutnaści žorstki, biesčałaviečny i źniavažlivy charaktar śmiarotnaha pakarańnia», — zajaviŭ kiraŭnik BDIPČ ABSIE.
Jon nahadvaje, što hetaje pytańnie było ŭ centry ŭvahi ŭdzielnikaŭ kanfierencyi, jakaja prajšła ŭ sakaviku ŭ Minsku i była arhanizavanaja Ministerstvam zamiežnych spraŭ Biełarusi, pastajannym pradstaŭnikom AAN u Biełarusi i pasolstvam Vialikabrytanii.
«Ja pierakanany, što pryviadzieńnie ŭ vykanańnie prysudu ŭ dačynieńni da Siarhieja Ivanova supiarečyć suśvietnaj tendencyi da admieny hetaha vidu pakarańnia, źjaŭlajecca nieprymalnym admaŭleńniem čałaviečaj hodnaści», — zajaviŭ Link.
Raniej, nahadajem, z padobnymi zajavami vystupili Jeŭrapiejski sajuz i Saviet Jeŭropy.
Biełaruś zastajecca adzinaj u Jeŭropie krainaj, dzie da hetaha času ŭžyvajecca śmiarotnaje pakarańnie. Z momantu nabyćcia krainaj niezaležnaści da rasstrełu byli pryhavoranyja bolš za 400 čałaviek, Alaksandr Łukašenka pamiłavaŭ ź ich liku tolki adnaho asudžanaha. Paśla vyniasieńnia kožnaha śmiarotnaha prysudu Saviet Jeŭropy, Jeŭrasajuz i pravaabarončyja arhanizacyi tradycyjna zaklikajuć biełaruskija ŭłady admovicca ad prymianieńnia śmiarotnaha pakarańnia i abviaścić maratoryj na hety vid pakarańnia.
Pavodle źviestak pravaabaroncaŭ, śmiarotnaj kary zaraz taksama čakajuć Ivan Kuleš (žorstkaje zabojstva troch čałaviek) i Hienadź Jakavicki (žorstkaje zabojstva adnaho čałavieka). Prysudy ab vyklučnaj miery pakarańnia ŭ dačynieńni da ich nabyli moc.
