Prezident Barak Abama stanie pieršym dziejnym prezidentam ZŠA, jaki naviedaje japonski horad Chirasima paśla jaho jadziernaj bambardziroŭki amierykanskaj avijacyjaj ŭ 1945 hodzie.
Jak zajaviŭ pres-sakratar Biełaha doma Džoš Ernest, prezident pryjedzie ŭ Chirasimu razam ź japonskim premjeram Sindza Abe, a paśla adpravicca ŭ Vjetnam.
«Prezident zrobić histaryčny vizit u Chirasimu razam z premjer-ministram Abe, kab padkreślić svaju prychilnaść idei spakojnaha i biaśpiečnaha śvietu bieź jadziernaj zbroi», — zajaviŭ Ernest.
U krasaviku horad naviedaŭ dziaržaŭny sakratar ZŠA Džon Kiery. Jon uskłaŭ vianok u pamiać achviar jadziernaha vybuchu i pakinuŭ zapis u haściavoj knizie. Kiery staŭ pieršym dziaržaŭnym sakratarom, jaki naviedaŭ Chirasimu, i zajaviŭ, što hanarycca hetym.
Tady ž paviedamlałasia, što ŭ mai horad moža naviedać i Abama, adnak dakładnaj infarmacyi na hety kont nie było. Da ciapierašniaha času dziejnyja prezidenty ZŠA Chirasimu nie naviedvali. U 1984 hodu tudy pryjazdžaŭ były prezident ZŠA Džymi Karter, ale jaho paŭnamoctvy da taho momantu ŭžo minuli.
Jadziernaja bambardziroŭka Chirasimy adbyłasia 6 žniŭnia 1945 hoda. Bomba pa mianušcy «Małyš» («Little Boy») vyklikała ciepłavuju chvalu, jakaja dasiahnuła tempieratury ŭ 4 tysiačy hradusaŭ i raspaŭsiudzilisia ŭ radyusie 4,5 kiłamietraŭ, faktyčna źniščyŭšy ŭvieś horad.
Vybuch bomby i jaho nastupstvy zabrali žyćci 140 tysiač čałaviek. Pry hetym niekatoryja historyki ličać, što bambavańnie dapamahło nablizić kaniec Druhoj suśvietnaj vajny.
