Upraŭleńnie Śledčaha kamitetu pa Haradzienskaj vobłaści raspačało kryminalnuju spravu pa fakcie śmierci šaścihadovaj dziaŭčynki paśla ŭviadzieńnia vakcyny.
Dziaŭčyncy była ŭviedziena kambinavanaja vakcyna suprać adru, paratytu i krasnuchi. Dziciačy lekar-reanimatolah Andrej Vituška miarkuje, što biada mahła zdarycca ź niekalkich pryčynaŭ:
«Albo heta była alerhičnaja reakcyja na niejkija kampanenty vakcyny, albo heta była reakcyja, źviazanaja z tym, što ŭ vakcynie byli niejkija rečyvy, jakija vyklikali taksyčnaje ŭździejańnie na arhanizm, što i mieła voś takija katastrafičnyja nastupstvy. Umoŭna kažučy, u vakcynie byli niejkija damieški ci pabočnyja składniki — toje, čaho nie pavinna było być. Heta i pryviało da śmierci ŭ vyniku vostraha atručeńnia. Heta ŭžo pavinna vyśvietlić sudova-medyčnaje daśledavańnie».
Peryjadyčna takoje zdarajecca, što leki dajuć pabočnyja efekty, kaža Andrej Vituška:
«Niahledziačy na kantrol jakaści, na farmakalahičnych vytvorčaściach čas ad času niešta zdarajecca. Apošni taki vypadak — adklikańnie fizijalahičnych rastvoraŭ niaśviskaj vytvorčaści, jakija davali pabočny efekt. Paru hadoŭ tamu ŭ Litvie byli prablemy ź biełaruskim askafenam, jaki taksama vyklikaŭ niepažadanyja reakcyi. Vyśvietliłasia, što ŭ jaho byli damiašanyja inšyja preparaty, bo dla vytvorčaści askafenu vykarystoŭvali liniju pa vytvorčaści inšaha preparatu. Pryčym heta byŭ preparat dla źnižeńnia cukru, i akurat jahonyja reštki trapili ŭ toj askafen, jaki źnižaŭ cukar. Zdajecca, adzin čałaviek navat pamior».
Medyk ličyć, što kožny taki vypadak pavinien stać padstavaj dla surjoznaha daśledavańnia.
«Tym bolš što kankretna hetaja vakcyna ŭ šaścihadovym uzroście ŭvodzicca druhi raz. Kali dahetul dziciaci ŭvodzili vakcynu i dziaŭčynka dažyła da šaści hadoŭ, to admoŭnaj reakcyi na jaje nie było. Ale mahło być i tak, što pieršaja reakcyja prajšła niezaŭvažna, a druhi raz mieła voś takija nastupstvy. U hetym ciapier i pavinny razabracca kampetentnyja orhany».
